ന്യൂഡല്‍ഹി: നേരത്തെ ഹൈക്കോടതിയിലും ഇപ്പോള്‍ സുപ്രിംകോടതിയിലും വ്യത്യസ്തമായ നിലപാട് സ്വീകരിച്ചതിനാല്‍ കേസില്‍ നിലപാട് എന്താണെന്ന് വ്യക്തമായി അറിയിക്കാന്‍ ബാബരി ഭൂമി തര്‍ക്ക കേസില്‍ നിര്‍മോഹി അഖാഡയോട് സുപ്രിംകോടതി. കേസില്‍ നേരത്തെ വാദം പൂര്‍ത്തിയാക്കിയ നിര്‍മോഹി അഖാഡയുടെ അഭിഭാഷകന്‍ സുശീല്‍ കുമാര്‍ ഇന്നലെ വീണ്ടും വാദം തുടങ്ങിയപ്പോഴാണ് കോടതി ആദ്യം നിലപാട് ഉറപ്പിക്കാന്‍ ആവശ്യപ്പെട്ടത്. സുപ്രിംകോടതിയില്‍ നടത്തിയ വാദം നേരത്തെ ഹൈക്കോടതിയില്‍ നടത്തിയതിന് വിഭിന്നമാണെന്ന് ചീഫ് ജസ്റ്റിസ് രഞ്ജന്‍ ഗൊഗോയ് ചൂണ്ടിക്കാട്ടി.
ഇന്നലെ ഹിന്ദുമഹാസഭയുടെ കക്ഷിയായ ഗോപാല്‍ സിങ് വിശാരദിന്റെ അഭിഭാഷകന്‍ രഞ്ജിത് കുമാറാണ് വാദം തുടങ്ങിയത്. ക്ഷേത്രം തകര്‍ത്താണ് ബാബരി മസ്ജിദ് നിര്‍മിച്ചതെന്ന് അബ്ദുല്‍ ഗനിയെന്നൊരാള്‍ നല്‍കിയ മൊഴിയുദ്ധരിച്ചായിരുന്നു വാദം. ഈ വ്യക്തിയെ ഹൈക്കോടതിയില്‍ എതിര്‍വിസ്താരം ചെയ്തതാണോ എന്ന കോടതിയുടെ ചോദ്യത്തിന് അല്ലെന്നായിരുന്നു അഭിഭാഷകന്റെ മറുപടി. എതിര്‍വിസ്താരം ചെയ്യാത്ത മൊഴി എങ്ങനെ കോടതി രേഖയുടെ ഭാഗമായെന്നും സുപ്രിംകോടതി ചോദിച്ചു. ഹരജിയുടെ ഭാഗമായി വന്നതാണെന്നായിരുന്നു അഭിഭാഷകന്റെ മറുപടി.