മക്ക: ഹജ്ജ് സേവന രംഗത്തും മക്കയില്‍ മയ്യിത്ത് പരിപാലന രംഗത്തും ജീവകാരുണ്യ രംഗത്തും സ്തുത്യര്‍ഹമായ സേവനം ചെയ്ത് മലയാളികള്‍ക്കിടയില്‍ അഭിമാനമായി മാറിയ കബീര്‍ ചേരൂരിന് എസ്.കെ.എസ്.എസ്.എഫ് സ്റ്റേറ്റ് കമ്മിറ്റി സ്നേഹാദരവ് നല്‍കി. മക്കയിലും മിനയിലും ഹജ്ജ് വേളയിലും അല്ലാത്തപ്പോഴും മരണപ്പെടുന്ന മയ്യിത്തുകളെ പരിപാലിക്കുകയും മരണാന്തര കര്‍മ്മങ്ങള്‍ ചെയ്തും മറമാടുകയും ചെയ്തതിലൂടെ സഊദി ഗവണ്‍മെന്റിന്റെയും വിവിധ വകുപ്പുകളുടെയും അഭിനന്ദനം നേടുകയും സര്‍ട്ടിഫിക്കറ്റ് നേടുകയും ചെയ്തിട്ടുണ്ട്.

മൂന്ന് മാസം മുന്‍പ് ഈജിപ്തില്‍ നടന്ന രാജ്യാന്തര മയ്യത്ത് പരിപാലന മത്സരത്തില്‍ സഊദി ഗവണ്‍മെന്റിന്റെ അനുമതിയോടു കൂടി ഈജിപ്തില്‍ പോകുകയും മൂന്നാം സ്ഥാനം കരസ്ഥമാക്കുകയും ചെയ്തിരുന്നു. ഏറ്റവും നല്ല സാമൂഹ്യ പ്രവര്‍ത്തനത്തിനാണ് വിഖായ സ്റ്റേറ്റ് കമ്മിറ്റി കബീര്‍ ചേരൂരിനെ ആദരിച്ചത്. ഹജ്ജ് സേവനത്തിനെത്തിയ വിഖായ ഹജ്ജ് വളണ്ടിയര്‍മാര്‍ക്കായി മക്കയില്‍ സംഘടിപ്പിച്ച പ്രത്യേക വിഖായ ക്യാമ്പില്‍ വെച്ച് എസ്.കെ.എസ്.എസ്.എഫ് സ്റ്റേറ്റ് നേതാക്കളായ ബഷീര്‍ ഫൈസി ദേശമംഗലം, റഷീദ് ഫൈസി വെള്ളായിക്കോട്, ജാബിര്‍ ഹുദവി, മുനീര്‍ ഫൈസി മാമ്പുഴ തുടങ്ങിയവരാണ് സ്നേഹോപഹാരം സമ്മാനിച്ചത്.സയ്യിദ് ഉബൈദുല്ല തങ്ങള്‍ മേലാറ്റൂര്‍, സലാം ഫൈസി വളവട്ടൂര്‍, ആനമംഗലം മുഹമ്മദ് കുട്ടി ഫൈസി, മോയിന്‍ കുട്ടി മാസ്റ്റര്‍ തുടങ്ങിയ നേതാക്കള്‍ പങ്കെടുത്തു.