മലപ്പുറം: സമൂഹമാധ്യമത്തിലൂടെ അപകീര്‍ത്തിപ്പെടുത്തിയെന്ന യുവതിയുടെ പരാതിയില്‍ യഥാര്‍ഥ പ്രതികളെ കണ്ടെത്താന്‍ ന്യൂനപക്ഷ കമ്മിഷന്‍ പൊലിസിന് നിര്‍ദ്ദേശം നല്‍കി. വ്യാജ ഫേസ് ബുക്ക് അക്കൗണ്ടുണ്ടാക്കിയാണ് അശ്ലീല പോസ്റ്റുകള്‍ പ്രചരിപ്പിച്ചത്. പ്രതികളെ കണ്ടെത്തുന്നതിനുള്ള ഊര്‍ജിത ശ്രമം നടത്തുമെന്ന് കമ്മിഷന്‍ മുന്‍പാകെ പൊലിസ് അറിയിച്ചു. പോസ്റ്റുകള്‍ ഷെയര്‍ ചെയ്തവര്‍ക്കെതിരെയും നിയമ നടപടിയുണ്ടാകും. ഒന്‍പത് കേസുകള്‍ തീര്‍പ്പാക്കി. എട്ട് പരാതികള്‍ കമ്മിഷന്‍ സ്വീകരിച്ചു. കമ്മിഷന്‍ ചെയര്‍മാന്‍ പി.കെ ഹനീഫ, അഡ്വ. മുഹമ്മദ് ഫൈസല്‍ എന്നിവര്‍ പങ്കെടുത്തു.

പ്ലസ്‌വണ്‍ സീറ്റ് അപര്യാപ്തത: കെ.എ.ടി.എഫ് പരാതി നല്‍കി

മലപ്പുറം: ജില്ലയിലെ പ്ലസ് വണ്‍ സീറ്റുകളിലെ അപര്യാപ്തതക്ക് പരിഹാരം കാണണമെന്നും ഹയര്‍ സെക്കന്‍ഡറിയില്‍ രണ്ടാം ഭാഷ തെരഞ്ഞെടുക്കാനുള്ള അവകാശം പുനസ്ഥാപിക്കണമെന്നും ആവശ്യപ്പെട്ട് കേരള അറബിക് ടീച്ചേഴ്‌സ് ഫെഡറേഷന്‍ ജില്ലാ കമ്മിറ്റി ന്യൂനപക്ഷ കമ്മിഷന് പരാതി നല്‍കി. കാല്‍ ലക്ഷത്തിലധികം വിദ്യാര്‍ഥികള്‍ക്ക് പഠന സൗകര്യമില്ലാത്ത സാഹചര്യത്തില്‍ കമ്മിഷന്‍ അടിയന്തരമായി ഇടപെടണമെന്ന് കെ.എ.ടി.എഫ് ആവശ്യപ്പെട്ടു. ജില്ലാ പ്രസിഡന്റ് പി.കെ ഷാഹുല്‍ ഹമീദ്, സെക്രട്ടറി എസ്.എ റസാഖ് എന്നിവരാണ് കമ്മിഷന്‍ മുന്‍പാകെ പരാതി നല്‍കിയത്.