ന്യൂഡല്‍ഹി: ലൈംഗിക അതിക്രമം സംബന്ധിച്ച് തുറന്നുപറച്ചില്‍ നടത്തിയ മാധ്യമപ്രവര്‍ത്തക പ്രിയാ രമണിക്കെതിരേ ഫയല്‍ചെയ്ത അപകീര്‍ത്തി കേസ് ;പിന്‍വലിക്കണമെന്ന് രാജിവച്ച കേന്ദ്രമന്ത്രി എം.ജെ അക്ബറിനോട് എഡിറ്റേഴ്‌സ് ഗില്‍ഡ് ആവശ്യപ്പെട്ടു. ലൈംഗിക ആരോപണ വിധേയനായി ബുധനാഴ്ചയാണ് അക്ബര്‍ വിദേശകാര്യ സഹമന്ത്രി പദവി രാജിവച്ചത്. രാജിയിലേക്കു നയിക്കുംവിധം പരാതിയില്‍ ഉറച്ചുനിന്ന വനിതകളെ എഡിറ്റേഴ്‌സ് ഗില്‍ഡ് പ്രശംസിച്ചു. നിലവിലെ കേസില്‍നിന്ന് അക്ബര്‍ പിന്മാറിയില്ലെങ്കില്‍ പ്രിയയ്ക്കു നിയമ പിന്തുണയുള്‍പ്പെടെയുള്ള സഹായങ്ങള്‍ നല്‍കും.
അക്ബറിനെതിരേ പരാതി ഉന്നയിച്ച മറ്റു വനിതകള്‍ക്കെതിരേയും മാനനഷ്ടക്കേസിനാണ് ശ്രമമെങ്കില്‍ അവര്‍ക്കും നിയമ പരിരക്ഷ ഉറപ്പാക്കും. തൊഴിലിടത്തില്‍ നേരിട്ട ലൈംഗിക അതിക്രമങ്ങള്‍ വെളിപ്പെടുത്തുന്ന മീ റ്റൂ കാംപയിനിന്റെ ഭാഗമായ വനിതാ മാധ്യമപ്രവര്‍ത്തകര്‍ക്കൊപ്പമാണ് സംഘടനയെന്നും എഡിറ്റേഴ്‌സ് ഗിള്‍ഡ് പ്രസ്താവനയില്‍ പറഞ്ഞു. സംഘടനയുടെ മുന്‍ പ്രസിഡന്റ് കൂടിയാണ് അക്ബര്‍.
അതേസമയം, മാനനഷ്ടക്കേസില്‍ എം.ജെ അക്ബറിന്റെ മൊഴിയെടുക്കാന്‍ ഡല്‍ഹി പട്യാലാ ഹൗസ് കോടതി തീരുമാനിച്ചു. ഈ മാസം 31ന് ഹാജരായി മൊഴി നല്‍കാന്‍ ആവശ്യപ്പെട്ട് കോടതി അക്ബറിന് നോട്ടിസയച്ചു. മാധ്യമപ്രവര്‍ത്തകന്‍ കൂടിയായ അക്ബര്‍ നേരത്തെ ജോലിചെയ്ത വിവിധ സ്ഥാപനങ്ങളിലെ 12 മാധ്യമപ്രവര്‍ത്തകരാണ് വ്യത്യസ്ത സമയങ്ങളില്‍ അദ്ദേഹത്തില്‍ നിന്നുണ്ടായ ലൈംഗിക അതിക്രമങ്ങള്‍ സോഷ്യല്‍മീഡിയയിലൂടെ തുറന്നുപറഞ്ഞത്. എന്നാല്‍, ആദ്യമായി വെളിപ്പെടുത്തല്‍ നടത്തിയ നേരത്തെ അക്ബറിനൊടൊപ്പം ടെലഗ്രാഫില്‍ ജോലിചെയ്ത പ്രിയാരമണിക്കെതിരേ മാത്രമാണ് അദ്ദേഹം കേസ് ഫയല്‍ചെയ്തത്. കഴിഞ്ഞദിവസം ഡല്‍ഹി മെട്രൊപൊളിറ്റന്‍ മജിസ്‌ട്രേറ്റ് സമര്‍വിശാല്‍ മുന്‍പാകെ കേസില്‍ വാദം നടക്കവെ, പ്രിയ രമണിയുടെ ആരോപണം അക്ബറിന്റെ സല്‍പ്പേരിനു കളങ്കം ചാര്‍ത്തിയെന്നും 40 വര്‍ഷം കൊണ്ടുണ്ടാക്കിയ സല്‍പ്പേരിനു പരിഹരിക്കാനാകാത്ത വിധം പോറലേറ്റുവെന്നും അദ്ദേഹത്തിനു വേണ്ടി ഹാജരായ ഗീത ലുത്ര ചൂണ്ടിക്കാട്ടി. 31ന് അക്ബര്‍ ഹാജരാവുമെന്നും അഭിഭാഷക കോടതിയെ അറിയിച്ചു.