ശ്രീനഗര്‍: ജമ്മുകശ്മിരിലുണ്ടായ രണ്ട് ഏറ്റുമുട്ടലുകളില്‍ അഞ്ച് ഭീകരരെ സുരക്ഷാ സേന വധിച്ചു. ബാരമുല്ല, ഉറി എന്നിവിടങ്ങളിലാണ് ഏറ്റുമുട്ടലുണ്ടായത്.
ബാരമുല്ല നഗരത്തില്‍ ഇന്നലെ ഉച്ചക്ക്് ശേഷം ചെക്ക് പോസ്റ്റില്‍ നടന്ന വെടിവയ്പില്‍ രണ്ട് ഭീകരര്‍ കൊല്ലപ്പെട്ടു.
ഭീകരന്‍ സഞ്ചരിച്ച വാഹനം പരിശോധിക്കുന്നതിനിടെ തിരച്ചറിയല്‍ രേഖ ആവശ്യപ്പെട്ടതോടെ ഇവര്‍ വെടിവയ്ക്കുകയായിരുന്നു.
വെടിവയ്പിനിടെ രണ്ട് ഭീകരരില്‍ ഒരാള്‍ രക്ഷപ്പെട്ടെങ്കിലും പിന്നീടുണ്ടായ തിരച്ചിലില്‍ ഇദ്ദേഹത്തെ കൊലപ്പെടുത്തിയെന്ന് ബാരമുല്ലയിലെ സീനിയര്‍ പൊലിസ് സുപ്രണ്ട് ഇംതിയാസ് ഹുസൈന്‍ പറഞ്ഞു.
എ.കെ 47 തോക്ക്, രണ്ട് ചൈനീസ് പിസ്റ്റളുകള്‍ എന്നിവ ഭീകരരില്‍ നിന്ന് പിടിച്ചെടുത്തെന്ന് അദ്ദേഹം പറഞ്ഞു.
ഇന്നലെ രാവിലെ ഉറക്ക് സമീപമുള്ള നിയന്ത്രണാതിര്‍ത്തിയിലുണ്ടായ ഏറ്റുമുട്ടലില്‍ മൂന്ന് പേരെ വധിച്ചെന്ന് സൈന്യം അറിയിച്ചു.
ടോര്‍ണ പേസ്റ്റില്‍ വ്യാഴാഴ്ച രാവിലെ മുതല്‍ ആരംഭിച്ച ഓപറേഷനിലാണ് ഇവരെ കൊലപ്പെടുത്തിയത്. സൈനിക പോസ്റ്റിന് നേരെ ഭീകരവാദികള്‍ വെടിയുതിര്‍ത്തതിനെ തുടര്‍ന്ന് തിരിച്ചടിക്കുകയായിരുന്നു.
കഴിഞ്ഞ ദിവസം ഫത്തേകാദല്‍ മേഖലയിലുണ്ടായ ഏറ്റുമുട്ടലില്‍ മൂന്ന് ഭീകരരെ സുരക്ഷാ സേന വധിച്ചിരുന്നു. ഏറ്റുമുട്ടലില്‍ പൊലിസ് ഉദ്യോസ്ഥന്‍ വീരമൃത്യു വരിച്ചിരുന്നു. ഭീകരര്‍ പ്രദേശത്ത് ഒളിച്ചുതമാസിക്കുന്നുണ്ടെന്ന് രഹസ്യ വിവരം ലഭിച്ചതിനെ തുടര്‍ന്ന് തിരച്ചില്‍ നടത്തുന്നതിനിടെയാണ് ഏറ്റുമുട്ടലുണ്ടായത്.
അതിനിടെ പുല്‍വാമിലെ സൈനിക ക്യാംപിലുണ്ടായ ഭീകരവാദ ആക്രമണത്തില്‍ ഒരു സ്ത്രീക്ക് പരുക്കേറ്റു. ഷാദിമാര്‍ഗ് ക്യാംപിലേക്ക് ഭീകരവാദി ഗ്രനേഡ് എറിയുകയായിരുന്നു. പരുക്കേറ്റ സ്ത്രീയെ ആശുപത്രിയിലേക്ക് മാറ്റിയെന്നും ഇവരുടെ നില തൃപ്തികരമാണെന്നും പൊലിസ് ഓഫിസര്‍ പറഞ്ഞു.