വെസ്റ്റ്ബാങ്ക്: അധിനിവിഷ്ട വെസ്റ്റ്ബാങ്കിലെ അനധികൃത ഇസ്‌റാഈലി കുടിയേറ്റകേന്ദ്രത്തിനടുത്ത് നടന്ന ബോംബ് സ്‌ഫോടനത്തില്‍ ഒരു ഇസ്‌റാഈലി കൊല്ലപ്പെടുകയും രണ്ടുപേര്‍ക്ക് പരുക്കേല്‍ക്കുകയും ചെയ്തു. 17കാരിയായ പെണ്‍കുട്ടിയാണ് കൊല്ലപ്പെട്ടത്. ഇവരുടെ അച്ഛനും സഹോദരനും പരുക്കുണ്ട്.
സഹോദരന്റെ പരുക്ക് ഗുരുതരമാണെന്ന് ഇസ്‌റാഈലി സൈന്യം അറിയിച്ചു. ഫലസ്തീനികളാണ് സ്‌ഫോടനത്തിനു പിന്നിലെന്ന് സൈന്യം ആരോപിച്ചു.
അല്‍അഖ്‌സ പള്ളിയുടെ കോംപൗണ്ടിനടുത്ത് ഇസ്‌റാഈലി പൊലിസുകാരനെ ആക്രമിക്കാന്‍ ശ്രമിച്ചതിന് 15ന് ഫലസ്തീന്‍ ബാലനെ വെടിവച്ചു കൊന്നിരുന്നു.
ഏപ്രിലില്‍ നടന്ന തെരഞ്ഞെടുപ്പില്‍ പ്രധാനമന്ത്രി നെതന്യാഹുവിന് ഭരിക്കാനാവശ്യമായ ഭൂരിപക്ഷം ലഭിക്കാത്ത സാഹചര്യത്തില്‍ സെപ്റ്റംബര്‍ 17ന് നടക്കുന്ന രണ്ടാം തെരഞ്ഞെടുപ്പിനോടനുബന്ധിച്ച് ഫലസ്തീനികള്‍ക്കു നേരെ കൂടുതല്‍ ആക്രമണമുണ്ടായേക്കുമോ എന്ന ആശങ്ക മേഖലയില്‍ നിലനില്‍ക്കുന്നുണ്ട്.