മട്ടാഞ്ചേരി: പശ്ചിമകൊച്ചിയില്‍ പൊലിസിന്റെ നേതൃത്വത്തില്‍ സ്‌കൂള്‍ വാഹനങ്ങളില്‍ വ്യാപകമായി പരിശോധന നടത്തി. ഇന്നലെ രാവിലെ മട്ടാഞ്ചേരി സബ് ഡിവിഷന്‍ പരിധിയിലുള്ള ആറ് സ്റ്റേഷനുകളിലേയും എസ്.ഐമാരുടെ നേതൃത്വത്തിലാണ് വാഹനങ്ങള്‍ പരിശോധിച്ചത്. ഫോര്‍ട്ട്‌കൊച്ചിയില്‍ അമ്പതോളം വാഹനങ്ങള്‍ പരിശോധിച്ചപ്പോള്‍ മദ്യപിച്ച് സ്‌കൂള്‍ കുട്ടികളുമായി ഓട്ടോറിക്ഷ ഓടിച്ചതിന് ഒരാള്‍ പിടിയിലായി.
മട്ടാഞ്ചേരി കപ്പലണ്ടിമുക്ക് സ്വദേശി ബാലസുബ്രഹ്മണ്യം(50)ആണ് പിടിയിലായത്. ഇയാളുടെ ലൈസന്‍സ് സസ്‌പെന്റ് ചെയ്യുന്നതായി പൊലിസ് മട്ടാഞ്ചേരി ജോയിന്റ് ആര്‍.ടി.ഒക്ക് അപേക്ഷ നല്‍കിയിട്ടുണ്ട്. ഹാര്‍ബര്‍ സ്റ്റേഷന്‍ പരിധിയില്‍ മുപ്പതോളം വാഹനങ്ങള്‍ പരിശോധിച്ചപ്പോള്‍ കേന്ദ്രീയ വിദ്യാലയയുടെ ബസ് ഓടിച്ച ഡ്രൈവര്‍ മദ്യപിച്ചതായി കണ്ടെത്തി.
അരൂര്‍ കെല്‍ട്രോണ്‍ റോഡില്‍ കടവില്‍ പറമ്പില്‍ ദയാനന്ദന്‍(49)നെതിരെ പൊലിസ് കേസെടുത്തു.തോപ്പുംപടിയിലും പള്ളുരുത്തിയിലും കണ്ണമാലിയിലും പരിശോധന നടത്തിയെങ്കിലും കേസൊന്നും റിപ്പോര്‍ട്ട് ചെയ്തിട്ടില്ല. എസ്.ഐമാരായ സുരേഷ് കുമാര്‍, കെ.എല്‍ മഹേഷ്, എ.വിനോജ്,സി.വിനു,വി.വിമല്‍,ഷൈജു ഇബ്രാഹിം എന്നിവരുടെ നേതൃത്വത്തിലാണ് പരിശോധന നടന്നത്.