മുട്ടില്‍: അടിസ്ഥാന സൗകര്യങ്ങളുടെ അഭാവം മൂലം പുതുക്കി പണിത മുട്ടില്‍ ടൗണിലെ ബസ് സ്റ്റാന്‍ഡിലേക്ക് ബസുകള്‍ കയറുന്നില്ലന്ന് പരാതി. മഴ പെയ്താല്‍ ചളിക്കുളം, മഴ മാറിയാല്‍ പൊടി ശല്യം, ഉരുളന്‍ കല്ലുകളും പൊടിയും ചളിയും നിറഞ്ഞ മുട്ടില്‍ ബസ് സ്റ്റാന്‍ഡ് യാത്രക്കാര്‍ക്കും ഗ്രാമ പഞ്ചായത്തിനും ഒരു പോലെ തലവേദനയാകുകയാണ്.
ബസുകളുടെ മത്സര ഓട്ടത്തിനിടിയില്‍ ചില ബസുകള്‍ സ്റ്റാന്‍ഡില്‍ കയറുന്നില്ലന്നും കയറുന്ന ബസുകള്‍ക്ക് തൊട്ട് പുറകെ വരുന്ന ബസുകളുമായി മത്സരിക്കേണ്ട അവസ്ഥയുമാണുള്ളതെന്ന് ബസ് ജീവനക്കാര്‍ പറയുന്നു.
ബസ് സ്റ്റാന്‍ഡില്‍ ക്വാറി വേസ്റ്റിട്ട ഭാഗങ്ങളിലൂടെ ബസ് വരുമ്പോള്‍ പൊടി ശല്യവും രൂക്ഷമാണ്. മഴ പെയ്താല്‍ നടക്കാന്‍ കഴിയാത്ത വിധം ചളിയും ക്വാറി വേസ്റ്റും കുഴഞ്ഞ് കിടക്കും.
ഈ പ്രതിസന്ധികള്‍ക്കിടയിലും ബസ് കാത്തിരിപ്പ് കേന്ദ്രത്തില്‍ യാത്രക്കാര്‍ ഇരിക്കുമ്പോള്‍ ബസുകള്‍ സ്റ്റാന്‍ഡിലേക്ക് കയറാതെ റോഡ് സൈഡില്‍ ആളെ ഇറക്കി പോകുകയാണ്.
 ഇതോടെ സ്റ്റാന്‍ഡിലിരിക്കുന്ന യാത്രക്കാര്‍ എവിടെയാണ് ബസ് കാത്തിരിക്കേണ്ടതെന്നറിയാതെ വലയുകയാണ്. അടിസ്ഥാന സൗകര്യങ്ങള്‍ വേണ്ട രീതിയില്‍ ഒരുക്കാതെയാണ് പഞ്ചായത്ത് ഭരണ സമിതി ബസുകള്‍ സ്റ്റാന്‍ഡിലേക്ക് കയറണമെന്ന് പറയുന്നതെന്ന ആക്ഷേപവും ശക്തമാണ്.