കല്ലമ്പലം: നാവായിക്കുളം പ്രദേശത്ത് കഴിഞ്ഞദിവസം പുലര്‍ച്ചെയുണ്ടായ ശക്തമായ ഇടിമിന്നലില്‍ ഒരു വയോധികന്‍ മരിച്ചു. ഒരു യുവാവിന് പരുക്കേറ്റു. നിരവധി വീടുകളിലെ ഇലക്ട്രിക്, ഇലക്ട്രോണിക് ഉപകരണങ്ങള്‍ക്ക് കേടുപാടുകള്‍ സംഭവിച്ചു.
ശക്തമായ ഇടിമിന്നലില്‍ ദേഹാസ്വാസ്ഥ്യം അനുഭവപ്പെട്ട് ഡീസന്റ്മുക്ക് ഐരമണ്‍നില തോട്ടുംമുഖത്തു വീട്ടില്‍ ഷംസുദ്ദീനെ (75) പാരിപ്പള്ളി മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചെങ്കിലും മരിച്ചു. ഇദ്ദേഹം ഹൃദ്രോഗത്തിനു ചികിത്സയിലായിരുന്നു. ഭാര്യ: പരേതയായ ആരിഫാബീവി. മക്കള്‍: നവാസ്, ഹസീന. മരുമക്കള്‍: അബുസ, താജുദ്ദീന്‍. കിഴക്കനേലായില്‍ മൊബൈല്‍ ഫോണില്‍ നിന്നും ഷോക്കേറ്റ് യുവാവിന് പരുക്ക്. മൊബൈല്‍ ഫോണില്‍ ഇയര്‍ഫോണ്‍ പ്രവര്‍ത്തിപ്പിച്ചുകൊണ്ടിരിക്കെയാണ് പരുക്കേറ്റത്.
ശരീരം മുഴുവന്‍ ഷോക്കേറ്റതുപോലെ തോന്നുകയും ചെവിക്ക് ശക്തമായ വേദന അനുഭവപ്പെടുകയും ചെയ്തതോടെ ആശുപത്രിയില്‍ ചികിത്സ തേടി. കിഴക്കനേല, മുക്കുകട, ഡീസന്റ്മുക്ക് പ്രദേശങ്ങളിലെ നിരവധി വീടുകളില്‍ ഇലക്ട്രിക് ഉപകരണങ്ങള്‍ ഇടിമിന്നലില്‍ നശിച്ചു.