കാഞ്ഞങ്ങാട്: ദേശീയപാതയില്‍ കുണിയ ഗവ.ഹയര്‍ സെക്കന്‍ഡറി സ്‌കൂളിനു സമീപം ബൈക്ക് യാത്രക്കാരനെ ഇടിച്ചു തെറിപ്പിച്ച ലോറിയുടെ ജീവനക്കാരോ ആര്‍.സി.ഉടമയോ ഇതു വരെ ബേക്കല്‍ പൊലിസ് സ്റ്റേഷനുമായി ബന്ധപ്പെടാത്തതിനാല്‍ അന്വേഷണത്തിനായി പൊലിസ് കര്‍ണാടകയിലേക്ക് തിരിക്കും. ഇക്കഴിഞ്ഞ നാലിനു രാത്രി പത്തോടെയായിരുന്നു അപകടമുണ്ടായത്.
അപകടത്തില്‍ കുണിയ നവോദയ നഗര്‍ കുണ്ടൂരിലെ എ.കെ മഹ്മൂദ് സംഭവ സ്ഥലത്തു തന്നെ മരിച്ചിരുന്നു.
കുണിയ ജുമാ മസ്ജിദില്‍ നിന്നും തറാവീഹ് നിസ്‌കാരം കഴിഞ്ഞു വീട്ടിലേക്കു പോകുകയായിരുന്ന മഹ്മൂദ് സഞ്ചരിച്ച ബൈക്കിനു പിറകില്‍ ലോറി ഇടിക്കുകയായിരുന്നു. സംഭവത്തെ തുടര്‍ന്ന് അപകട സ്ഥലത്തിനു കുറച്ചകലെ ലോറി ഉപേക്ഷിച്ച് ഇതിലെ ജീവനക്കാര്‍ ഓടി രക്ഷപ്പെടുകയായിരുന്നു. ലോറി പൊലിസ് കസ്റ്റഡിയില്‍ എടുത്തെങ്കിലും ഇതുമായി ബന്ധപ്പെട്ടു ഇതു വരെ ആരും അന്വേഷിച്ചു വരാത്തതില്‍ ദുരൂഹത ഉയര്‍ന്നിട്ടുണ്ട്. കെ.എ.22 ബി -9427 നമ്പര്‍ ടോറസ് ലോറിയാണ് അപകടം വരുത്തിയത്.
മംഗളൂരു ഭാഗത്തു നിന്നു കണ്ണൂര്‍ ഭാഗത്തേക്ക് ഇരുമ്പ് ലോഡുമായി സഞ്ചരിക്കുകയായിരുന്നു ലോറി.
കര്‍ണാടകയിലെ ബെല്‍ഗാവിയിലാണ് അപകടം വരുത്തിയ ലോറി രജിസ്റ്റര്‍ ചെയ്തതെന്നാണു സൂചന. കെ.എ. 22 ബെല്‍ഗാവി(ബെല്‍ഗാം) ആര്‍.ടി ഓഫിസ് നമ്പറായാണ് ഉപയോഗിക്കുന്നത്.