തിരൂര്‍: യാത്രക്കാരുടെ സുരക്ഷയ്ക്കായി പൊലിസും മോട്ടോര്‍ വാഹന വകുപ്പും ട്രാന്‍സ്‌പോര്‍ട്ട് ബസുകളുടെയും ടാക്‌സി വാഹനങ്ങളുടെയും ചരക്ക് ലോറികളുടെയും ഫിറ്റ്‌നസ് പരിശോധന തുടങ്ങി. വാഹനങ്ങളുടെ ബ്രേക്ക് സംവിധാനത്തിന്റെയും ടയറുകളുടെയും കാര്യക്ഷമത, സിഗ്നല്‍ ലൈറ്റുകളുടെ പ്രവര്‍ത്തനം തുടങ്ങിയ കാര്യങ്ങളാണ് പരിശോധിക്കുന്നത്.
യാത്രക്കാരുമായി സര്‍വിസ് നടത്തുന്നതിനിടെയാണ് ബസുകള്‍ തടഞ്ഞു നിര്‍ത്തിയുള്ള പരിശോധന. പരിശോധനയില്‍ അപാകത ബോധ്യപ്പെട്ടാല്‍ താക്കീത് നല്‍കിയും പിഴ ചുമത്തിയുമാണ് പൊലിസ്- മോട്ടോര്‍ വാഹന വകുപ്പ് ഉദ്യോഗസ്ഥര്‍ നടപടിയെടുക്കുന്നത്. എന്നാല്‍ ശക്തമായ നടപടിയില്ലാത്തതിനാല്‍ ബസ് ജീവനക്കാരും ടാക്‌സി ഡ്രൈവര്‍മാരും പരിശോധനയെ ഗൗരവത്തിലെടുത്തിട്ടില്ല.
മഴക്കാലത്തുള്ള യാത്രയില്‍ വാഹനങ്ങളുടെ പ്രവര്‍ത്തനം കാര്യക്ഷമമല്ലെങ്കില്‍ അതു അപകടങ്ങള്‍ക്ക് കാരണവുമെന്നതിനാലാണ് വ്യാപകമായി വാഹന പരിശോധനയ്ക്ക് സംസ്ഥാന തലത്തില്‍ തന്നെ നിര്‍ദേശം നല്‍കിയിരിക്കുന്നത്.