പള്ളിക്കല്‍: ശബരിമല സ്ത്രീ പ്രവേശനവുമായി ബന്ധപ്പെട്ട് കഴിഞ്ഞ ദിവസം നടന്ന ഹര്‍ത്താലില്‍ മലപ്പുറം-കോഴിക്കോട് ജില്ലാ അതിര്‍ത്തിയായ ചേലേമ്പ്ര ഇടിമുഴിക്കല്‍ ദേശീയപാതയില്‍ ടാങ്കര്‍ ലോറികളുള്‍പ്പെടെ നൂറിലേറെ ചരക്ക് ലോറികള്‍ ഹര്‍ത്താല്‍ അനുകൂലികള്‍ തടഞ്ഞിട്ടു. നൂറുകണക്കിന് വരുന്ന ബി.ജെ.പി, ആര്‍.എസ്.എസ് പ്രവര്‍ത്തകര്‍ രാവിലെ ആറോടെ തന്നെ ജില്ലാ അതിര്‍ത്തിയായ ദേശീയപാത ഇടിമുഴിക്കലില്‍ വാഹനം തടയാനെത്തിയിരുന്നു.
ഇവര്‍ ദേശീയപാതയില്‍ നടത്തിയ പ്രകടനമുള്‍പ്പെടെയുള്ള രംഗങ്ങള്‍ ഫോട്ടോയെടുക്കാന്‍ മാധ്യമ പ്രവര്‍ത്തകരെ സമരക്കാര്‍ അനുവദിച്ചില്ല. പൊലിസിന് മുന്നില്‍ വാഹനങ്ങള്‍ തടഞ്ഞിട്ടിട്ടും പ്രതികരിക്കാന്‍ പൊലിസിനായില്ല. കിലോ മീറ്ററുകളോളം ദൂരത്തിലാണ് ദേശീയപാതയില്‍ വാഹനങ്ങള്‍ തടഞ്ഞിട്ടിരുന്നത്. ഇതര സംസ്ഥാന ലോറികളാണ് തടഞ്ഞിട്ടവയില്‍ ഏറേയും. ഭക്ഷണവും കുടിവെള്ളവും ലഭിക്കാതെ വൈകിട്ട് വരെ ലോറി ജീവനക്കാര്‍ പ്രയാസമനുഭവിച്ചു.
ഹര്‍ത്താല്‍ ദിനത്തില്‍ ടൗണുകളില്‍ കടകളും സര്‍ക്കാര്‍ സ്ഥാപനങ്ങളും അടഞ്ഞു കിടന്നു. കാലിക്കറ്റ് സര്‍വകലാശാലയും ഹര്‍ത്താലില്‍ പ്രവര്‍ത്തിച്ചില്ല. സര്‍വകലാശാലയുടെ മെയിന്‍ കവാടമുള്‍പ്പെടെ രാവിലെ മുതല്‍ അടച്ചിട്ട നിലയിലായിരുന്നു. സ്വകാര്യ വാഹനങ്ങളും പൊതുവേ റോഡില്‍ ഇറങ്ങിയില്ല. ആശുപത്രികളിലേക്കും വിമാനത്താവളത്തിലേക്കും പോകുന്ന വാഹനങ്ങളെ ഹര്‍ത്താലില്‍ നിന്നും ഒഴിവാക്കിയിട്ടുണ്ടെങ്കിലും ഇത്തരം വാഹനങ്ങള്‍ റോഡില്‍ തടഞ്ഞ് ചോദ്യം ചെയ്യലിന് ശേഷമാണ് സമരക്കാര്‍ വിട്ടയച്ചത്. എന്നാല്‍ സമരക്കാരുമായി വാക്കേറ്റത്തിന് മുതിര്‍ന്ന പലരേയും പലയിടത്തും മണിക്കൂറുകളോളം തടഞ്ഞിടുകയും ചെയ്തിട്ടുണ്ട്.