വടകര: മുനിസിപ്പാലിറ്റിയുടെ അറവുശാലയിലെ മാലിന്യം ചാക്കില്‍ കെട്ടി വഴിയരികില്‍ നിക്ഷേപിച്ച നിലയില്‍.
സഹിക്കാന്‍ പറ്റാത്ത ദുര്‍ഗന്ധത്തിന്റെ പിടിയിലാണ് പരിസരം. മാലിന്യം ജനവാസ കേന്ദ്രത്തില്‍ തള്ളിയ നടപടിയില്‍ നാട്ടുകാര്‍ കടുത്ത പ്രതിഷേധത്തിലാണ്.
ദിവസങ്ങളായി കെട്ടിക്കിടക്കുന്ന മാലിന്യത്താല്‍ വഴിയാത്രക്കാരും കച്ചവടക്കാരും പൊറുതി മുട്ടിയിരിക്കുകയാണ്. രൂക്ഷമായ ഗന്ധം കാരണം കച്ചവടക്കാര്‍ക്ക് കടയിലിരിക്കാനോ ജോലി ചെയ്യാനോ കഴിയുന്നില്ല.
അറവുശാലയിലെ മാലിന്യം ശാസ്ത്രീയമായി സംസ്‌കരിക്കാന്‍ നടപടിയില്ലാത്തതിനാല്‍ പരിസരത്തു തന്നെ തള്ളുന്ന നിലയിലായി കാര്യങ്ങള്‍.
മുനിസിപ്പല്‍ ഹെല്‍ത്ത് ജീവനക്കാര്‍ തന്നെ സമീപത്തെ ഓവര്‍ബ്രിഡ്ജിനു താഴെ മാലിന്യം ചാക്കില്‍കെട്ടി തള്ളിയതായാണ് പരിസരവാസികള്‍ പറയുന്നത്.
മഴ പെയ്തതോടെ ദിവസങ്ങളായുള്ള മാലിന്യം അഴുകി പരന്നിരിക്കുകയാണ്.
മഴക്കാല രോഗങ്ങളെകുറിച്ച് ബോധവത്കരണം നടത്തുന്ന നഗരസഭതന്നെ ഇത്തരം പ്രവൃത്തി ചെയ്തതാണ് ജനങ്ങളെ അത്ഭുതപ്പെടുത്തുന്നത്. ടൗണിലെ ചെറുകിട കച്ചവടക്കാര്‍ പ്ലാസ്റ്റിക് കവറോ മറ്റോ കടക്കു മുന്നിലിട്ടാല്‍ 5000വും 10000വും പിഴ ഈടാക്കുന്ന മുന്‍സിപ്പാലിറ്റി തന്നെ മാലിന്യം വഴിയരികില്‍ തള്ളി ദുരിതം സമ്മാനിക്കുകയാണെന്നു നാട്ടുകാര്‍ പരാതിപ്പെട്ടു.