തൃക്കരിപ്പൂര്‍: കോണ്‍ഗ്രസ് വിട്ട് സി.പി.എം പാളയത്തിലേക്കു ചേക്കേറിയ ഷാഹിദാ കമാലിനോട് കലിപ്പടങ്ങാതെ വലിയപറമ്പിലെ കോണ്‍ഗ്രസ്. സംസ്ഥാന വനിതാ കമ്മിഷനും വലിയപറമ്പ കുടുംബശ്രീ സി.ഡി.എസും സംഘടിപ്പിച്ച സ്ത്രീ ശാക്തീകരണ സെമിനാര്‍ ബഹിഷ്‌കരിച്ചാണ് കോണ്‍ഗ്രസ് കലിപ്പു തീര്‍ത്തത്.
വലിയപറമ്പ പഞ്ചായത്ത് ഭരണസമിതിയുടെ നേതൃത്വത്തിലാണ് സെമിനാര്‍ സംഘടിപ്പിക്കാന്‍ തീരുമാനിച്ചത്. എന്നാല്‍ വനിതാ കമ്മിഷന്‍ അംഗം ഷാഹിദാ കമാല്‍ പങ്കെടുക്കുമെന്ന് അറിഞ്ഞതോടെ കോണ്‍ഗ്രസ് പരിപാടി ബഹിഷ്‌കരിക്കാന്‍ തീരുമാനിക്കുകയായിരുന്നു.
യു.ഡി.എഫ് ജില്ലാ നേതാവിനെ ഉപയോഗപ്പെടുത്തി ഭരണസമിതി നേരിട്ടു പരിപാടി നടത്തുന്നത് ഒഴിവാക്കണമെന്നായി വാദം. ഒടുവില്‍ ഗ്രാമപഞ്ചായത്ത് പ്രസിഡന്റ് മുസ്‌ലിം ലീഗിലെ എം.ടി ജബ്ബാറിനെ സമ്മര്‍ദ്ദത്തിലാക്കി ഭരണസമിതി നേരിട്ടു നടത്തുന്നതില്‍ നിന്ന് ഒഴിവാക്കി കുടുംബശ്രീ സി.ഡി.എസിന്റെ പേരിലായി നടത്തിപ്പ്. എന്നാല്‍ സെമിനാറില്‍ നിന്നു പ്രസിഡന്റ് അടക്കം യു.ഡി.എഫ് അംഗങ്ങള്‍ വിട്ടു നില്‍ക്കണമെന്നായി കോണ്‍ഗ്രസ്. ഇതോടെ പരിപാടി വിജയിപ്പിക്കാനുള്ള ശ്രമമായി സി.പി.എമ്മിന്. പരമാവധി സ്ത്രീകളെ പങ്കെടുപ്പിച്ച് സെമിനാര്‍ വിജയകരമായി നടത്തുകയും ചെയ്തു.
സെമിനാര്‍ സംസ്ഥാന വനിതാകമ്മിഷന്‍ അംഗം ഷാഹിദാ കമാല്‍ ഉദ്ഘാടനം ചെയ്തു. ഗ്രാമപഞ്ചായത്ത് അംഗം പുഷ്പ അധ്യക്ഷയായി. നീലേശ്വരം ബ്ലോക്ക് പഞ്ചായത്ത് അംഗം വി.പി ജാനകി മുഖ്യാതിഥിയായി.
പഞ്ചായത്ത് അംഗങ്ങളായ വി.കെ കരുണാകരന്‍, മുഹമ്മദ് കുഞ്ഞി, മുന്‍ പഞ്ചായത്ത് പ്രസിഡന്റുമാരായ സി.വി കണ്ണന്‍, പി ശ്യാമള, സി.ഡി.എസ് ചെയര്‍പേഴ്‌സണ്‍ ഇ.കെ ബിന്ദു, സി.ഡി.എസ് മെമ്പര്‍ സെക്രട്ടറി ജിജേഷ് വി ശശീന്ദ്രന്‍ പ്രസംഗിച്ചു. അഡ്വ. കെ. പീതാംബരന്‍ ക്ലാസെടുത്തു.