തളിപ്പറമ്പ്: ആക്ടിവിസ്റ്റുകളും ഫെമിനിസ്റ്റുകളും മാധ്യമശ്രദ്ധ നേടാന്‍ ശബരിമലയില്‍ ആചാരാനുഷ്ഠാനങ്ങള്‍ ലംഘിക്കുകയാണെന്ന് ഡി.സി.സി പ്രസിഡന്റ് സതീശന്‍ പാച്ചേനി. ശബരിമല വിഷയത്തില്‍ വിശ്വാസികളുടെ വികാരം മുഖവിലക്കെടുക്കാന്‍ കേന്ദ്ര-സംസ്ഥാന സര്‍ക്കാരുകള്‍ തയാറാവാത്തത് പ്രതിഷേധാര്‍ഹമാണെന്നും അദ്ദേഹം പറഞ്ഞു.
തളിപ്പറമ്പില്‍ മണ്ഡലം കോണ്‍ഗ്രസ് പ്രസിഡന്റ് ടി.വി രവീന്ദ്രന്റെ ചുമതലയേല്‍ക്കല്‍ ചടങ്ങ് ഉദ്ഘാടനം ചെയ്യുകയായിരുന്നു അദ്ദേഹം. ശബരിമല വിഷയത്തിലെ വിധിയില്‍ കോടതിക്കും വീഴ്ച പറ്റിയെന്നത് യാഥാര്‍ഥ്യമാണ്. കോടതി വിധിയെ വിശ്വാസികളുടെ ആശങ്കകള്‍ കണക്കിലെടുത്ത് കൈകാര്യം ചെയ്യാന്‍ കേന്ദ്രം ഭരിക്കുന്ന ബി.ജെ.പിക്കും സംസ്ഥാനം ഭരിക്കുന്ന സി.പി.എമ്മിനും സാധിച്ചിട്ടില്ല. കോടതി വിധിക്കെതിരേ റിവ്യൂ പെറ്റീഷന്‍ നല്‍കാന്‍ ഇരുസര്‍ക്കാരുകളും താല്‍പര്യം കാണിച്ചിട്ടില്ല. ആക്ടിവിസ്റ്റുകളും ഫെമിനിസ്റ്റുകളും മാധ്യമ ശ്രദ്ധ കിട്ടാന്‍ ശബരിമലയില്‍ എത്തിയപ്പോഴുണ്ടായ വിശ്വാസി പ്രതിഷേധം കണ്ടില്ലെന്ന് നടിക്കരുത്. നൂറ്റാണ്ടുകള്‍ പഴക്കമുള്ള ശബരിമലയില്‍ ഇത്തരമൊരവസ്ഥ സൃഷ്ടിച്ചതിന്റെ ഉത്തരവാദിത്വം സര്‍ക്കാരിനാണെന്നും സതീശന്‍ പാച്ചേനി വിമര്‍ശിച്ചു.
സി.വി ഉണ്ണി അധ്യക്ഷനായി. മാര്‍ട്ടിന്‍ ജോര്‍ജ്ജ്, രജനി രമാനന്ദ്, ടി. ജനാര്‍ദ്ദനന്‍, ഇ.ടി രാജീവന്‍, മനോജ് കൂവേരി, നൗഷാദ് ബ്ലാത്തൂര്‍, കല്ലിങ്കീല്‍ പത്മനാഭന്‍, പി.എം പ്രേംകുമാര്‍, വത്സല പ്രഭാകരന്‍, ടി. സരസ്വതി, കെ. രഞ്ജിത്ത്, ടി.വി രവീന്ദ്രന്‍ പ്രസംഗിച്ചു.