വെങ്ങപ്പള്ളി: ശംസുല്‍ ഉലമാ ഇസ്‌ലാമിക് അക്കാദമി റമദാന്‍ കാംപയിന്‍ വന്‍ വിജയമാക്കാനും സ്ഥാപനത്തിന്റെ അടിസ്ഥാന സൗകര്യങ്ങള്‍ വിപുലപ്പെടുത്തുന്നതിനുള്ള ഫണ്ട് ശേഖരണത്തിന് വേണ്ടി വിതരണം ചെയ്യപ്പെട്ട കവറുകള്‍ തിരിച്ചേല്‍പ്പിച്ച് സ്ഥാപന പുരോഗതിയില്‍ പങ്കാളികളാവാനും ജില്ലാഖാസിയും, സ്ഥാപന പ്രസിഡന്റുമായ പാണക്കാട് ഹൈദരലി ശിഹാബ് തങ്ങള്‍ ആവശ്യപ്പെട്ടു. മതസ്ഥാപനങ്ങളുടെ നിലനില്‍പ്പുതന്നെ ചോദ്യം ചെയ്യപ്പെട്ട് കൊണ്ടിരിക്കുന്ന കാലത്ത് സ്ഥാപന നടത്തിപ്പ് ഏറെ ശ്രമകരമായ ദൗത്യമാണെന്നും, മഹല്ലു കമ്മിറ്റികളുടെയും പൊതു സമൂഹത്തിന്റെയും പിന്തുണയോടെ മാത്രമേ ഇത്തരം സംരംഭങ്ങള്‍ വിജയിപ്പിച്ചെടുക്കുവാന്‍ സാധിക്കുകയുള്ളൂവെന്നും അദ്ദേഹം പറഞ്ഞു. കവറുകള്‍ തിരിച്ചേല്‍പ്പിക്കുന്നതിന്റെ ഉദ്ഘാടനം ചെയര്‍മാന്‍ പി.സി ഇബ്രാഹിം ഹാജിക്ക് നല്‍കി തങ്ങള്‍ നിര്‍വഹിച്ചു. പാണക്കാട് സയ്യിദ് സ്വാദിഖലി ശിഹാബ് തങ്ങള്‍, മുസ്‌ലിം ലീഗ് ദേശീയ ജനറല്‍ സെക്രട്ടറി പി.കെ കുഞ്ഞാലിക്കുട്ടി എം.പി എന്നിവരും കവറുകള്‍ തിരിച്ചേല്‍പ്പിച്ചു, മുഹ്‌യുദ്ദീന്‍കുട്ടി യമാനി, ഇബ്‌റാഹീം ഫൈസി പേരാല്‍, ടി.കെ അബൂബക്കര്‍ മൗലവി തുടങ്ങിയവര്‍ സംബന്ധിച്ചു.