കോഴിക്കോട്: രാമദാസ് വൈദ്യരുടെ ചരമ വാര്‍ഷിക ദിനാചരണത്തോടനുബന്ധിച്ച് നടത്തിയ സംസ്ഥാന തല കാര്‍ട്ടൂണ്‍ മത്സരത്തില്‍ കോട്ടയം ജില്ലയിലെ ചെങ്ങളം സ്വദേശി സുഭാഷ് കല്ലൂര്‍ വിജയിയായി. കേരളശബ്ദം വാരികയിലെ കാര്‍ട്ടൂണിസ്റ്റാണ്. ഡോക്ടര്‍മാര്‍ക്കായി സംഘടിപ്പിച്ച 'ചികിത്സാ കൗതുകം' മത്സരത്തില്‍ ഡോ. ഗഫൂര്‍ ഒന്നാംസ്ഥാനം നേടി.
നാളെ ടൗണ്‍ഹാളില്‍ നടക്കുന്ന വൈദ്യര്‍ അനുസ്മരണ സമ്മേളനത്തില്‍ പുരസ്‌കാരങ്ങള്‍ സമ്മാനിക്കും. വൈകുന്നേരം അഞ്ചിന് ചലച്ചിത്ര സംവിധായകന്‍ ടി.വി ചന്ദ്രന്‍ അനുസ്മരണ സമ്മേളനം ഉദ്ഘാടനം ചെയ്യും. നടനും എഴുത്തുകാരനുമായ വി.കെ ശ്രീരാമന്‍ അനുസ്മരണ പ്രഭാഷണം നടത്തും. മേയര്‍ തോട്ടത്തില്‍ രവീന്ദ്രന്റെ അധ്യക്ഷതയില്‍ നടക്കുന്ന ചടങ്ങില്‍ ജില്ലാ കലക്ടര്‍ യു.വി ജോസ്, ചെലവൂര്‍ വേണു, കമാല്‍ വരദൂര്‍, എ. സജീവന്‍, ഡോ. കെ.എം മന്‍സൂര്‍ പങ്കെടുക്കും.