ഹൈദരാബാദ്: മൗലാനാ ആസാദ് നാഷനല്‍ ഉര്‍ദു യൂനിവേഴ്‌സിറ്റി പ്രതിനിധികളുമായി ദാറുല്‍ഹുദാ ഇസ്‌ലാമിക് സര്‍വകലാശാലാ വി.സി ഡോ. ബഹാഉദ്ദീന്‍ മുഹമ്മദ് നദ്‌വി കൂടിക്കാഴ്ച നടത്തി.
മൗലാനാ ആസാദ് ഉര്‍ദു യൂനിവേഴ്‌സിറ്റി വൈസ് ചാന്‍സലര്‍ ഡോ. മുഹമ്മദ് അസ്‌ലം പര്‍വേസിന്റെ ഔദ്യോഗിക വസതിയിലായിരുന്നു കൂടിക്കാഴ്ച.
അക്കാദമിക രംഗത്തു യു.ജി.സിയുടെ മാനദണ്ഡങ്ങളനുസരിച്ചു സാധ്യമാകുന്നതരത്തില്‍ ഇരു സര്‍വകലാശാലകളും യോജിച്ചുപ്രവര്‍ത്തിക്കാന്‍ കൂടിക്കാഴ്ചയില്‍ ധാരണയായി. ഇതര സംസ്ഥാനങ്ങളിലെ ഉര്‍ദു വിദ്യാര്‍ഥികളുടെ സമന്വയ പഠനത്തിനായി ദാറുല്‍ഹുദായില്‍ സംവിധാനിച്ച നാഷനല്‍ ഇന്‍സ്റ്റിറ്റ്യൂട്ട് സന്ദര്‍ശിക്കാനും വിദ്യാര്‍ഥികളുമായി സംവദിക്കാനും വാഴ്‌സിറ്റിയിലെത്താമെന്നു ഡോ. പര്‍വേസ് വ്യക്തമാക്കി.
വാഴ്‌സിറ്റിയിലെ അറബിക് വിഭാഗം മേധാവി ഡോ. സയ്യിദ് അലീം അഷ്‌റഫി ജൈസി, ഇംഗ്ലീഷ് വിഭാഗം അസി. പ്രൊഫസര്‍ അസ്‌ലം ഹുദവി കൊണ്ടോട്ടി എന്നിവരും കൂടിക്കാഴ്ചയില്‍ സംബന്ധിച്ചു.