ന്യൂഡല്‍ഹി: ബാബരി മസ്ജിദ് തകര്‍ത്തതുമായി ബന്ധപ്പെട്ട ഗൂഢാലോചന കേസില്‍ വിചാരണ നടക്കുന്ന ലഖ്‌നൗവിലെ സി.ബി.ഐ കോടതിയില്‍ ബി.ജെ.പി നേതാക്കളായ എല്‍.കെ അദ്വാനി, മുരളി മനോഹര്‍ ജോഷി, കേന്ദ്രമന്ത്രി ഉമാഭാരതി എന്നിവര്‍ നേരിട്ടു ഹാജരാവേണ്ടതില്ല.
എല്ലാദിവസവും വിചാരണ നടക്കുന്നതിനാല്‍ പ്രതികള്‍ നേരിട്ടു ഹാജരാവേണ്ടതില്ലെന്നു വ്യക്തമാക്കിയാണ് ഇവര്‍ക്ക് കോടതി ഇളവ് നല്‍കിയത്. അദ്വാനിയുടെയും ജോഷിയുടെയും പ്രായം പരിഗണിച്ച് അവര്‍ക്ക് ഇളവ് നല്‍കണമെന്നും കേന്ദ്രമന്ത്രിയായതിനാല്‍ ഉമാഭാരതിക്ക് എല്ലാ ദിവസവും കോടതിയില്‍ ഹാജരാകാന്‍ കഴിയില്ലെന്നും അവരുടെ അഭിഭാഷകന്‍ കോടതിയില്‍ അറിയിച്ചു. ഇത് അംഗീകരിച്ച കോടതി, ആവശ്യപ്പെട്ടാല്‍ ഇവര്‍ നേരിട്ടു ഹാജരാകേണ്ടി വരുമെന്നും അറിയിക്കുകയായിരുന്നു.
കേസില്‍ അദ്വാനിയുള്‍പ്പെടെയുള്ള 12 പേര്‍ക്കെതിരേ കോടതി കഴിഞ്ഞമാസം 30ന് കുറ്റം ചുമത്തിയിരുന്നു. കേസില്‍ നിന്നൊഴിവാക്കിത്തരണമെന്നാവശ്യപ്പെട്ട് മൂന്നുപേരും നല്‍കിയ ഹരജി തള്ളിയ ജഡ്ജി എസ്.കെ യാദവ് 50,000 രൂപയുടെ ഉറപ്പിന്‍മേല്‍ ഇവര്‍ക്കു ജാമ്യം നല്‍കിയിരുന്നു. ആര്‍.എസ്.എസ്- വി.എച്ച്.പി നേതാക്കളായ വിനയ് കത്യാര്‍, സാക്ഷി മഹാരാജ്, വിഷ്ണുഹരി ഡാല്‍മിയ, രാംവിലാസ് വേദാന്തി, സ്വാധി ഋതംബര, മഹന്ദ് നൃത്യഹോപാല്‍ദാസ്, ചമ്പത്ത് റായി, സതീഷ് പ്രധാന്‍ എന്നിവരും കേസിലെ പ്രതികളാണ്. രാജസ്ഥാന്‍ ഗവര്‍ണര്‍ കല്യാണ്‍ സിങും കേസില്‍ പ്രതിയാണെങ്കിലും ഭരണഘടനാപദവിയിലുള്ളതിനാല്‍ ഇപ്പോള്‍ അദ്ദേഹത്തെ വിചാരണചെയ്യില്ല. ഗവര്‍ണര്‍ പദവി ഒഴിഞ്ഞശേഷമാവും ഇദ്ദേഹത്തെ വിചാരണചെയ്യുക.