മുള്ളൂര്‍ക്കര(തൃശൂര്‍): ബൈക്കിന് പിറകില്‍ സഞ്ചരിക്കവെ ചക്രത്തില്‍ ധരിച്ചിരുന്ന മുണ്ട് കുരുങ്ങി റോഡില്‍ തലയടിച്ച് വീണ് യുവാവ് മരിച്ചു. മുള്ളൂര്‍ക്കര സ്‌കൂളിന് സമീപം എടലംകുന്ന് അപ്പനത്ത്പറമ്പില്‍ സുന്ദരന്റെ മകന്‍ സുജിത്ത്(ബാബു 28)ആണ് മരിച്ചത്. കഴിഞ്ഞ ദിവസം രാത്രിയില്‍ ആറ്റൂര്‍ ബൈപാസില്‍ വച്ചാണ് അപകടം. ഖത്തറില്‍ നിര്‍മാണമേഖലയില്‍ ജോലി ചെയ്യുന്ന സുജിത്ത് അവിടുത്തെ ജോലി ഉപേക്ഷിച്ച് ബഹ്‌റൈനിലേക്ക് പോകാന്‍ വിസ മാറ്റത്തിനായി വെള്ളിയാഴ്ചയാണ് നാട്ടിലെത്തിയത്.
സുഹൃത്ത് എസ്.എന്‍ നഗര്‍ സ്വദേശി കൃഷ്ണകുമാറി(30)നോടൊപ്പം ചെറുതുരുത്തിയില്‍ നിന്ന് ബൈക്കില്‍ മുള്ളൂര്‍ക്കരയിലേക്ക് വരുന്നതിനിടയിലാണ് അപകടം. ബൈക്ക് ഓടിച്ചിരുന്ന കൃഷ്ണ കുമാര്‍ അതീവ ഗുരുതരാവസ്ഥയില്‍ മുളങ്കുന്നത്ത്കാവ് മെഡിക്കല്‍ കോളജ് ആശുപത്രിയില്‍ ചികിത്സയിലാണ്. സുജിത്ത് അവിവാഹിതനാണ്. മാതാവ്: ശാരദ. സഹോദരങ്ങള്‍: സുമേഷ്,സുരാജ്.