മണ്ണാര്‍ക്കാട്: അപകടങ്ങള്‍ തുടര്‍ക്കഥയായ കാര പാലത്തിന് സമീപം സംരക്ഷണ ഭിത്തി ഉയര്‍ത്തികെട്ടണമെന്നാവശ്യം ശക്തമാവുന്നു. നിരവധി കഅപകടങ്ങളാണ് കഴിഞ്ഞ രണ്ട് മാസത്തിനിടെ പാലത്തിന് സമീപമുണ്ടായത്.
സംസ്ഥാന പാതയായ കുമരംപുത്തൂര്‍ - മേലാറ്റൂര്‍ റോഡില്‍ കര്‍ക്കിടാംകുന്ന് കാര പാലത്തിന് സമീപമാണ് അപകടം പതിയിരിക്കുന്നത്. പാലത്തിനോട് ചേര്‍ന്ന് അപകട സൂചകമായി ചെറിയ സിമന്റ് കാലുകള്‍ സ്ഥാപിച്ചിരുന്നുവെങ്കിലും വിവിധ അപകടങ്ങളില്‍ അവയെല്ലാം തകര്‍ന്നിട്ടുണ്ട്. മേലാറ്റൂര്‍ ഭാഗത്ത് നിന്ന് ഇറക്കം ഇറങ്ങി വരുന്ന വാഹനങ്ങള്‍ അമിതവേഗതയിലാവുന്നതോടെ എതിര്‍ ദിശയില്‍ നിന്ന് വരുന്ന വാഹനങ്ങളാണ് ഏറെയും അപകടത്തില്‍പ്പെടുന്നത്. റോഡില്‍ അപകടങ്ങളെ സൂചിപ്പിക്കുന്ന ബോര്‍ഡുകളില്ലാത്തതും അപകടങ്ങള്‍ക്ക് കാരണമാവുന്നുണ്ട്. പാലത്തോട് ചേര്‍ന്ന് ഇരുവശങ്ങളും വന്‍ ഗര്‍ത്തമാണുളളത്. ഏകദേശം 25 അടിയോളം താഴ്ചയാണ് പാലത്തിന്റെ ഇരുഭാഗങ്ങളിലെ ഇരുവശങ്ങളിലുമുളളത്. ഈയിടെയായി ഗര്‍ത്തത്തിലേക്ക് മറിഞ്ഞത് അഞ്ചോളം വാഹനങ്ങളാണ്.
അവസാനമായി കഴിഞ്ഞ മാസം അര്‍ദ്ധ രാത്രി കാര്‍ നിയന്ത്രണം വിട്ട് തോട്ടിലേക്കാണ് മറിഞ്ഞത്. കാറിലുണ്ടായിരുന്ന രണ്ട് പേര്‍ അത്ഭുതകരമായാണ് രക്ഷപ്പെട്ടത്. ശക്തമായ മഴയില്‍ തോട് നിറഞ്ഞൊഴികി കൊണ്ടിരിക്കുന്നത് മൂലം കയറുപയോഗിച്ചാണ് കാറിനെ തടഞ്ഞിട്ടത്. രാവിലെയാണ് വിദഗ്ധ സംഘമെത്തി കാറിനെ തോട്ടില്‍ നിന്ന് എടുത്തത്.
ഇതിനു തൊട്ടുമുമ്പ് സംഭവിച്ച ഓട്ടോറിക്ഷ തലകുത്തി മറിഞ്ഞ അപകടത്തില്‍ യുവതിക്ക് പരുക്കേറ്റിരുന്നു. അപകടങ്ങള്‍ നിത്യ സംഭവമായ പാലത്തോട് ചേര്‍ന്നുളള ഇരുഭാഗങ്ങളിലെ ഇരുവശങ്ങളിലും സംരക്ഷണഭിത്തി ഉയര്‍ത്തി കെട്ടണമെന്നാണ് ജനകീയാവശ്യം.