അരീക്കോട്: സ്‌കൂള്‍ പരിസരത്തുനിന്നു കഞ്ചാവ് ഉപയോഗിച്ച അഞ്ചു പ്ലസ്ടു വിദ്യാര്‍ഥികളെ പൊലിസ് പിടികൂടി. അരീക്കോട് പെരുമ്പറമ്പ് ഗവ. ഹയര്‍സെക്കന്‍ഡറി സ്‌കൂള്‍ പരിസരത്താണ് സംഭവം. സ്‌കൂള്‍ വിട്ടതിനു ശേഷം വീട്ടില്‍പോകാതെ കുട്ടികള്‍ സ്‌കൂളില്‍നിന്നു ലഹരിവസ്തുക്കള്‍ ഉപയോഗിക്കുന്നതായി നാട്ടുകാര്‍ പരാതിപ്പെട്ടിരുന്നു.
തുടര്‍ന്നു പൊലിസ് നടത്തിയ അന്വേഷണത്തിനിടെയാണ് ബാഗില്‍നിന്നു കഞ്ചാവ്, ലൈറ്റര്‍, സിഗരറ്റ്, ചുക്ക എന്നീ ലഹരിവസ്തുക്കള്‍ കണ്ടെത്തിയത്. സ്‌കൂളില്‍നിന്നു പലതവണ പുറത്താക്കല്‍ നടപടി നേരിട്ടിട്ടുള്ള വിദ്യാര്‍ഥിയാണ് മറ്റുള്ളവര്‍ക്കു കഞ്ചാവ് എത്തിച്ചുനല്‍കുന്നതെന്ന് എസ്.ഐ കെ. സിനോദ് പറഞ്ഞു. പരിസര പ്രദേശങ്ങളിലേക്കു കഞ്ചാവെത്തിക്കുന്ന സംഘത്തിലെ പ്രധാന കണ്ണിയെക്കുറിച്ച് അന്വേഷണം ആരംഭിച്ചിട്ടുണ്ട്.
കഴിഞ്ഞ വര്‍ഷം ഇതേ സ്‌കൂളിലെ വിദ്യാര്‍ഥിക്കു കഞ്ചാവ് എത്തിച്ചുനല്‍കിയ പ്രതിയെ പൊലിസ് അറസ്റ്റ് ചെയ്തിരുന്നു. പിടികൂടിയ വിദ്യാര്‍ഥികളുടെ രക്ഷിതാക്കളെ വിളിച്ചുവരുത്തി വിദ്യാര്‍ഥികളെ കൗണ്‍സിലിങ്ങിനു വിധേയമാക്കണമെന്ന നിര്‍ദേശം നല്‍കിയാണ് പൊലിസ് വിട്ടയച്ചത്. ദിവസങ്ങള്‍ക്കു മുന്‍പു പൊലിസ് നടത്തിയ വാഹനപരിശോധനയ്ക്കിടെ പതിനേഴുകാരി ഓടിച്ച ബൈക്കിന്റെ സീറ്റിനടിയില്‍നിന്ന് ഒന്നര കിലോ കഞ്ചാവ് പിടികൂടിയിരുന്നു. പെണ്‍കുട്ടിയുടെ പക്കല്‍ കഞ്ചാവ് കൊടുത്തയച്ചതു പിതാവായതിനാല്‍ കുട്ടിയെ മാതാപിതാക്കള്‍ക്കൊപ്പം വിട്ടിരുന്നില്ല. കുട്ടി ഇപ്പോള്‍ കോഴിക്കോട് ഒബ്‌സര്‍വേഷന്‍ ഹോമില്‍ കഴിഞ്ഞുവരികയാണ്. പെണ്‍കുട്ടിയുടെ പേരില്‍ കേസ് രജിസ്റ്റര്‍ ചെയ്യും.പ്രായപൂര്‍ത്തിയാകാത്തതിനാല്‍ ജുവനൈല്‍ ജസ്റ്റിസ് ബോര്‍ഡ് മുന്‍പാകെ ഇതുസംബന്ധിച്ചു റിപ്പോര്‍ട്ട് നല്‍കും.
അരീക്കോട് എസ്.ഐ കെ. സിനോദ്, സി.പി.ഒ പ്രജീഷ്, സുരേഷ് എന്നിവരടങ്ങുന്ന സംഘമാണ് വിദ്യാര്‍ഥികളെ പിടികൂടിയത്. രാത്രി കാലങ്ങളില്‍ മഞ്ചേരിയില്‍നിന്ന് ഓട്ടോറിക്ഷയില്‍ ലഹരിവസ്തുക്കള്‍ അരീക്കോട്ടും പരിസര പ്രദേശങ്ങളിലും വ്യാപകമായി എത്തുന്നുണ്ട്. ഇവ സ്‌കൂള്‍ വിദ്യാര്‍ഥികളിലേക്കെത്തിക്കാന്‍ പെണ്‍കുട്ടികളെയും ലഹരി മാഫിയ രംഗത്തിറക്കുന്നുണ്ട്.