തിരുവനന്തപുരം: പ്രോപിയോണിക് അസിഡീമിയ ബാധിച്ച കുട്ടിയുടെ ശരിയായ ചികിത്സ തടസപ്പെടുത്തുകയും അശാസ്ത്രീയ ചികിത്സ നല്‍കി കുട്ടിയെ കൊലയ്ക്ക്‌കൊടുക്കുകയും ചെയ്ത സംഭവത്തില്‍ വ്യാജ വൈദ്യനെതിരേ കൊലക്കുറ്റം ചുമത്തി ശക്തമായ നിയമ നടപടികള്‍ സ്വീകരിക്കണമെന്ന് ഇന്ത്യന്‍ മെഡിക്കല്‍ അസോസിയേഷന്‍ ആവശ്യപ്പെട്ടു.
കുട്ടിയെ അശാസ്ത്രീയ ചികിത്സയ്ക്ക് വിധേയമാക്കിയ മാതാപിതാക്കള്‍ക്ക് എതിരേയും നടപടിയുണ്ടാകണം. സംഭവത്തിലെ കുറ്റക്കാര്‍ക്കെതിരേ കേസ് എടുക്കണമെന്നും സമാനമായ രീതിയില്‍ വ്യാജ ചികിത്സ നടത്തുന്നവര്‍ക്ക് എതിരേ ശക്തമായ നടപടികള്‍ വേണമെന്നും ആവശ്യപ്പെട്ട് മുഖ്യമന്ത്രിക്ക് ഇന്ത്യന്‍ മെഡിക്കല്‍ അസോസിയേഷന്‍ നിവേദനം നല്‍കുമെന്നും ഭാരവാഹികള്‍ അറിയിച്ചു.
പല വിദേശരാജ്യങ്ങളിലും ഇത്തരം സംഭവങ്ങളില്‍ മാതാപിതാക്കള്‍ക്കെതിരേ നിയമ നടപടി സ്വീകരിക്കാറുണ്ട്. അത്തരം നടപടികള്‍ കേരളത്തിലും വേണം.
എങ്കില്‍ മാത്രമേ ഇത്തരം വ്യാജ ചികിത്സകരുടെ കരാളഹസ്തങ്ങളില്‍നിന്ന് മോചനം ഉണ്ടാകാന്‍ സാധ്യതയുള്ളൂവെന്നും ഐ.എം.എ പത്രക്കുറിപ്പില്‍ അറിയിച്ചു.