ശ്രീകണ്ഠപുരം: ചുഴലി ഹയര്‍സെക്കന്‍ഡറി സ്‌കൂളിലെ താത്കാലിക അധ്യാപക നിയമനവുമായി ബന്ധപ്പെട്ട് സി.പി.എമ്മില്‍ വിവാദം. മുന്‍പഞ്ചായത്ത് പ്രസിഡന്റും വളക്കൈ ലോക്കല്‍ കമ്മിറ്റിയംഗവുമായ അധ്യാപകനെ ഒഴിവാക്കി മറ്റൊരു നേതാവിന്റെ ഭാര്യയെ തത്സ്ഥാനത്തു നിയമിക്കാനാണ് നീക്കം. ഇതിന്റെ ഭാഗമായി കവിയും സാംസ്‌കാരിക പ്രവര്‍ത്തകനുമായ മിനേഷ് മണക്കാടിനെ ഒഴിവാക്കി. രണ്ടുദിവസമായി സ്‌കൂളില്‍ മലയാളം വിഭാഗത്തില്‍ താത്കാലിക അധ്യാപകനായി ജോലി ചെയ്യുകയായിരുന്ന മിനേഷിനെ യാതൊരു കാരണവുമില്ലാതെ നീക്കം ചെയ്യുകയായിരുന്നു. എന്നാല്‍ മാനദണ്ഡങ്ങള്‍ പാലിക്കാതെയാണ് നിയമനം നടത്തിയതെന്നും അതിനാലാണ് നിയമനം റദ്ദാക്കിയതെന്നും ജില്ലാപഞ്ചായത്ത് പ്രസി. കെ.വി സുമേഷ് പറഞ്ഞു. ഇന്ന് സ്‌കൂളില്‍ വീണ്ടും കൂടികാഴ്ച നടക്കുമെന്നാണ് വിവരം.