വാഷിങ്ടണ്‍: സഊദി കിരീടാവകാശി സല്‍മാന്‍ ബിന്‍ മുഹമ്മദിനെ രൂക്ഷമായി വിമര്‍ശിച്ച് വാഷിങ്ടണ്‍ പോസ്റ്റ് കോളത്തിലടക്കം എഴുതിയിരുന്നു ജമാല്‍ കഷോഗി. മരണത്തിനു തൊട്ടുമുന്‍പ് നല്‍കിയ ഒരു അഭിമുഖത്തിലും കിരീടാവകാശിയുടെ ഏകാധിപത്യ ഭരണത്തെ അദ്ദേഹം വിമര്‍ശിച്ചു. അമേരിക്കന്‍ മാധ്യമമായ 'ന്യൂസ്‌വീക്ക് ' ആണ് കഷോഗിയുടെ അവസാന അഭിമുഖം തിരോധാന വാര്‍ത്ത പുറത്തുവന്നയുടന്‍ പ്രസിദ്ധീകരിച്ചത്.
താന്‍ സഊദി ഭരണത്തിന്റെ പ്രതിപക്ഷമല്ലെന്നും നല്ലൊരു സഊദിക്കു വേണ്ടിയാണ് തന്റെ വിമര്‍ശങ്ങളെന്നുമായിരുന്നു അദ്ദേഹത്തിന്റെ നിലപാട്. ഭരണകൂടത്തെ അട്ടിമറിക്കണമെന്ന് ഞാന്‍ പറയില്ല. അത് അസാധ്യവും ശ്രമകരവുമാണ്. സഊദി ഭരണകൂടത്തെ അട്ടിമറിക്കാന്‍ കഴിയുന്ന ഒരാളും നിലവില്‍ ഇവിടെയില്ല. അതുകൊണ്ടു തന്നെ ഭരണ പരിഷ്‌കരണമാണ് ആവശ്യപ്പെടുന്നത്-അഭിമുഖത്തില്‍ കഷോഗി പറയുന്നു.
സഊദി ദരിദ്ര ജനതയുമായി ബന്ധമില്ലാത്ത പഴഞ്ചന്‍ ഗോത്ര നേതാവാണ് മുഹമ്മദ് ബിന്‍ സല്‍മാനെന്നാണ് കഷോഗി വിശേഷിപ്പിച്ചത്. ആധുനികതയുടെയും അതെ തുടര്‍ന്നുള്ള മാറ്റങ്ങളുടെയും ഫലങ്ങള്‍ അദ്ദേഹം ആസ്വദിച്ചു. അതോടൊപ്പം പ്രപിതാവിനെ പോലെ സഊദിയെ ഭരിക്കണമെന്നും അദ്ദേഹം ആഗ്രഹിക്കുന്നു. അദ്ദേഹം ജനങ്ങളെ കാണുന്നില്ല. അവരെ കണ്ടാല്‍ അദ്ദേഹം പരിഷ്‌കരണങ്ങള്‍ക്കു തുടക്കം കുറിക്കുമായിരുന്നു-അഭിമുഖത്തില്‍ തുടരുന്നു.
ഇന്നലെ സഊദി പുറത്താക്കിയ കിരീടാവകാശിയുടെ മുഖ്യ മാധ്യമ ഉപദേഷ്ടാവ് സഊദ് അല്‍ ഖഹ്താനിക്കെതിരേയും അഭിമുഖത്തില്‍ കഷോഗി രൂക്ഷവിമര്‍ശം നടത്തുന്നുണ്ട്. കവര്‍ച്ചക്കാരും കൊള്ളക്കാരുമാണ് കിരീടാവകാശിയുടെ സഹായികളെന്നും അദ്ദേഹം വിമര്‍ശിച്ചു.