മാഡ്രിഡ്: പരാജയ ദുരന്തം വിട്ടുമാറാതെ റയല്‍ മാഡ്രിഡ്. സ്പാനിഷ് ലീഗ് ലാ ലിഗയില്‍ ഇന്നലെ നടന്ന മത്സരത്തില്‍ ലെവാന്റെയോട് ഒന്നിനെതിരേ രണ്ട് ഗോളുകള്‍ക്കാണ് റയല്‍ പരാജയപ്പെട്ടത്.
രണ്ട് ഗോളുകള്‍ക്ക് പിറകില്‍ നിന്ന റയലിന് വേണ്ടി 72ാം മിനുട്ടില്‍ മാഴ്‌സലോ ഒരു ഗോള്‍ മടക്കി തോല്‍വി ഭാരം കുറച്ചു. തുടര്‍ച്ചയായ നാലാം മത്സരത്തിലാണ് റയല്‍ പാരജയപ്പെടുന്നത്. 71 ശതമാനം പന്ത് കൈവശം വച്ചെങ്കിലും ലെവാന്റെ ഒരുക്കിയ പ്രതിരോധക്കോട്ട കടക്കാന്‍ റയല്‍ താരങ്ങള്‍ നാന്നായി വിയര്‍ത്തു.
ആറാം മിനുട്ടില്‍ ലൂയിസ് മൊറാലസും 13ാം മിനുട്ടില്‍ പെനാല്‍റ്റിയിലൂടെ റോജര്‍ മാര്‍ട്ടിയും ലെവാന്റെക്ക് വേണ്ടി ഗോള്‍ നേടി. തോല്‍വിയോടെ റയല്‍ പോയിന്റ് പട്ടികയില്‍ അഞ്ചാം സ്ഥാനത്തേക്ക് പിന്തള്ളപ്പെട്ടു. മറ്റൊരു മത്സരത്തില്‍ ഡിപോര്‍ട്ടീവോ അലാവസ് സെല്‍റ്റ വിഗോയെ 1-0ത്തിന് തോല്‍പിച്ചു.
ലണ്ടന്‍: പ്രീമിയര്‍ ലീഗിലെ ഗ്ലാമര്‍ പോരാട്ടം സമനിലയില്‍. മുന്‍നിര ക്ലബുകളായ ചെല്‍സിയും മാഞ്ചസ്റ്റര്‍ യുനൈറ്റഡും തമ്മില്‍ നടന്ന മത്സരമാണ് 2-2 സമനിലയില്‍ കലാശിച്ചത്. സ്വന്തം കാണികള്‍ക്ക് മുന്‍പില്‍ തോല്‍വിയുടെ വക്കില്‍നിന്ന് ശക്തമായ തിരിച്ചുവരവ് നടത്തിയാണ് ചെല്‍സി മാഞ്ചസ്റ്ററിനെ സമനിലയില്‍ തളച്ചത്. 21ാം മിനുട്ടില്‍ റൂഡിഗറിന്റെ ഗോളില്‍ മുന്നില്‍കടന്ന ചെല്‍സി രണ്ടാം പകുതിയില്‍ രണ്ട് ഗോള്‍ പിറകില്‍ പോയതിന് ശേഷമാണ് സമനില പിടിച്ചത്. 55, 73 മിനുട്ടുകളില്‍ ഗോള്‍ നേടി മാര്‍ഷ്യലാണ് ചെല്‍സിക്ക് വെല്ലുവിളി ഉയര്‍ത്തിയത്. മത്സരം അവസാനിക്കാനിരിക്കെ 96ാം മിനുട്ടില്‍ ബാര്‍ക്ലി ചെല്‍സിയുടെ രക്ഷകനാവുകയായിരുന്നു. മറ്റു മത്സരങ്ങളില്‍ മാഞ്ചസ്റ്റര്‍ സിറ്റി 5-0ത്തിന് ബേണ്‍ലിയെയും കാര്‍ഡിഫ് സിറ്റി 4-2ന് ഫുള്‍ഹാമിനെയും ടോട്ടനം ഹോട്‌സ്പര്‍ 1-0ത്തിന് വെസ്റ്റ്ഹാം യുനൈറ്റഡിനെയും പരാജയപ്പെടുത്തി. ബേണ്‍ലിക്കെതിരേ അഗ്യൂറോ (17), ബെര്‍ണാഡോ സില്‍വ (54), ഫെര്‍ണാണ്ടീഞ്ഞോ (56), മഹ്‌റെസ് (83), സനെ (90) എന്നിവരാണ് മാഞ്ചസ്റ്റര്‍ സിറ്റിയുടെ ഗോള്‍ നേടിയത്.