കണ്ണൂര്‍: മധ്യപ്രദേശിലെ മാന്‍സോറില്‍ സമരം നടത്തിയ കര്‍ഷകരെ വെടിവച്ചു കൊന്നതിലും സ്ഥലത്തെത്തിയ കോണ്‍ഗ്രസ് ഉപാധ്യക്ഷന്‍ രാഹുല്‍ ഗാന്ധിയെ പൊലിസ് കസ്റ്റഡിയിലെടുത്തതിലും പ്രതിഷേധിച്ച് യൂത്ത് കോണ്‍ഗ്രസ് പ്രവര്‍ത്തകര്‍ കണ്ണൂരില്‍ ട്രെയിന്‍ തടഞ്ഞു പ്രതിഷേധിച്ചു. ഇന്നലെ വൈകുന്നേരം കണ്ണൂരിലെത്തിയ മംഗളൂരു-ചെന്നൈ മെയിലാണു മൂന്നാം പ്ലാറ്റ്‌ഫോമില്‍ ഇരുപത്തിയഞ്ചോളം പ്രവര്‍ത്തകര്‍ തടഞ്ഞിട്ടത്. ഇതുകാരണം ട്രെയിന്‍ 15 മിനിറ്റോളം വൈകിയാണു കണ്ണൂരില്‍ നിന്നു യാത്ര തുടര്‍ന്നത്. 

സമരം സംസ്ഥാനസെക്രട്ടറി ജോഷി കണ്ടത്തില്‍ ഉദ്ഘാടനം ചെയ്തു. ലോക്‌സഭാ മണ്ഡലം വൈസ് പ്രസിഡന്റ് ഒ.കെ പ്രസാദ് അധ്യക്ഷനായി. നൗഷാദ് ബ്ലാത്തൂര്‍, രഞ്ജിത് നടുവില്‍, രാഹുല്‍ ദാമോദരന്‍, ഷമേജ് പെരളശ്ശേരി, സി.ടി അഭിജിത്, അശ്വിന്‍ മുതുക്കോത്ത് തുടങ്ങിയവര്‍ നേതൃത്വം നല്‍കി.