തൃശൂര്‍: കാറില്‍ അനധികൃതമായി കടത്തുകയായിരുന്ന 400 ലിറ്റര്‍ വ്യാജമദ്യം കോലഴിയില്‍ വച്ച് എക്‌സൈസ് സംഘം പിടികൂടി. സംഭവുമായി ബന്ധപ്പെട്ട് മലപ്പുറം സ്വദേശിയെ അറസ്റ്റ് ചെയ്തു . കൊണ്ടോട്ടി ചേലേമ്പ്ര പനങ്ങേല്‍ പുരായി  അഖിലേഷ്(29) ആണ് അറസ്റ്റിലായത്. 700 വിദേശ മദ്യക്കുപ്പികളിലായി നിറച്ച്  പെട്ടിയിലാക്കി കാറിന്റെ ഡിക്കിയിലും സീറ്റിലുമായാണ് വ്യാജമദ്യം സൂക്ഷിച്ചിരുന്നത്.
പുതുച്ചേരിയിലെ ഒരു മദ്യനിര്‍മാണ ശാലയിലെ പേരാണ് മദ്യം സൂക്ഷിച്ചിരുന്ന പെട്ടികളില്‍ ഉണ്ടായിരുന്നത്. മാഹിയില്‍നിന്നുമാണ് ഇയാള്‍ മദ്യം വാങ്ങിയിരുന്നത്. ഓര്‍ഡര്‍ അനുസരിച്ച് ആവശ്യക്കാര്‍ക്ക് സ്വന്തം കാറില്‍ ഇയാള്‍ മദ്യം എത്തിച്ചു നല്‍കി വരികയായിരുന്നു. ഡ്രൈവിങ്ങില്‍ നൈപുണ്യമുള്ള പ്രതിയെ സാഹസികമായാണ് പൊലിസ് പിടികൂടിയത്.
രഹസ്യ വിവരത്തിന്റെ അടിസ്ഥാനത്തില്‍ വിയ്യൂരില്‍വച്ച് എക്‌സൈസ് സംഘം പ്രതിയുടെ വാഹനത്തിന് കൈ കാണിച്ചെങ്കിലും നിര്‍ത്തിയില്ല. തുടര്‍ന്ന് വാഹനത്തെ പിന്തുടര്‍ന്ന് പിടികൂടുകയായിരുന്നു. എക്‌സൈസ് ഡെപ്യൂട്ടി കമ്മിഷണര്‍ സലിംകുമാര്‍, കോലഴി എക്‌സൈസ് ഇന്‍സ്‌പെക്ടര്‍ ദേവദാസ്, എ.ഇ.ഐ രാംദാസ്, ഹരീഷ്, ബാഷ്പജന്‍, വിപിന്‍, സുരേഷ്‌കുമാര്‍, ഗോപകുമാര്‍, ജോസ് ഡിക്‌സന്‍, സിജന്‍ എന്നിവരുടെ നേതൃത്വത്തിലുള്ള സംഘമാണ് പ്രതിയെ പിടികൂടിയത്.