ദുബൈ: തുഷാര്‍ വെള്ളാപ്പള്ളി പണം നല്‍കാത്തതിനെ തുടര്‍ന്ന് ജയിലിലായ ശേഷം വിളിച്ച് സഹായം ആവശ്യപ്പെട്ടപ്പോള്‍ ഭീഷണിപ്പെടുത്തിയാണ് തുഷാര്‍ സംസാരിച്ചതെന്ന് പരാതിക്കാരനായ നാസില്‍ അബ്ദുല്ല.
പണം തരാന്‍ ഉദ്ദേശിക്കുന്നില്ലെന്നും നിന്നെക്കൊണ്ടു കഴിയുമെങ്കില്‍ വാങ്ങിക്കോ എന്ന തരത്തിലാണ് സംസാരിച്ചതെന്നും നാസില്‍ വ്യക്തമാക്കി.
താന്‍ അറസ്റ്റിലായ ശേഷം ഒരുപാട് കഷ്ടപ്പെട്ടു. ആ സമയം ഭാര്യ ഗര്‍ഭിണിയായിരുന്നു. നാട്ടില്‍ പോകാനായില്ല. സാമ്പത്തികമായി സഹായിക്കാനോ കൂടെ നില്‍ക്കാനോ കൂടെഉണ്ടാകുമെന്ന് പ്രതീക്ഷിച്ച ആരുമുണ്ടായിരുന്നില്ല. നാട്ടിലെ പരിചയക്കാരനായ വലിയ വ്യവസായിയെയും സഹായത്തിനായി സമീപ്പിച്ചപ്പോള്‍ താന്‍ ചെക്കുകേസില്‍ കുടുങ്ങിയവരെ സഹായിക്കില്ലെന്നു പറഞ്ഞാണ് ഇടനിലക്കാരോട്‌ അദ്ദേഹം ഒഴിഞ്ഞുമാറിയതെന്നും നാസില്‍ പറുന്നു.

തന്നെ കബളിപ്പിച്ച വ്യക്തി അതേ ചെക്കുകേസില്‍ അറസ്റ്റിലായി ഒരൊറ്റ ദിവസം ജയിലില്‍ കിടന്നപ്പോള്‍ അതേ വ്യക്തിതന്നെ അയാളെ പുറത്തിറക്കാന്‍ രംഗത്തെത്തിയെന്ന വിരോധാഭാസവും നാസില്‍ ചൂണ്ടിക്കാണിക്കുന്നു. തനിക്ക് രാഷ്ട്രീയ സ്വാധീനമില്ല. സമുദായ പിന്തുണയില്ല. തന്നെ സഹായിച്ചാല്‍ അതാരും അറിയാനും പോകുന്നില്ല, ഇത്രയും മീഡിയ കവറേജ് ലഭിക്കില്ലെന്നറിഞ്ഞതുകൊണ്ടുമാകും അദ്ദേഹത്തെപോലുള്ളവര്‍ അതിനു തുനിയാതിരുന്നതെന്നും നാസില്‍ വ്യക്തമാക്കി.
അതേ  സമയം ചെക്ക് കേസില്‍ അറസ്റ്റിലായി ജാമ്യത്തിലിറങ്ങിയ തുഷാര്‍ വെള്ളാപ്പള്ളി ജാമ്യ വ്യവസ്ഥയില്‍ ഇളവ് നല്‍കണമെന്നാവശ്യപ്പെട്ട് കോടതിയില്‍ അപേക്ഷ നല്‍കിയിരിക്കുകയാണ്. യു.എ.ഇ പൗരന്റെ പാസ്‌പോര്‍ട്ട് കോടതിയില്‍ സമര്‍പ്പിച്ച് സ്വന്തം പാസ്‌പോര്‍ട്ട് തിരികെ വാങ്ങാനാണ് ശ്രമം നടത്തുന്നത്. ഇതിനായി യു.എ.ഇ പൗരന്റെ പാസ്‌പോര്‍ട്ട് കോടതിയില്‍ സമര്‍പ്പിച്ചിട്ടുണ്ട്.
തുഷാറിന്റെ അപേക്ഷയില്‍ അജ്മാന്‍ കോടതി രണ്ടു ദിവസത്തിനകം തീരുമാനമെടുത്തേക്കുമെന്നാണറിയുന്നത്.