മഞ്ചേശ്വരം: കുഞ്ചത്തൂര്‍ മാടയില്‍  കെ.എസ്.ആര്‍.ടി.സി ബസ് തടഞ്ഞു ഡ്രൈവറെ സംഘം ചേര്‍ന്ന് ആക്രമിച്ചു. തിങ്കളാഴ്ച രാത്രിയിലാണ് സംഭവം. കാസര്‍കോട്ട് നിന്നും മംഗളൂരുവിലേക്ക് പോവുകയായിരുന്ന കെ.എല്‍ കെ.എസ്.ആര്‍.ടി.സി ലിമിറ്റഡ് സ്‌റ്റോപ്പ് ബസാണ് ഓട്ടോ ഡ്രൈവറുടെ നേതൃത്വത്തിലുള്ള സംഘം തടഞ്ഞിടുകയും ഡ്രൈവറെ വലിച്ചിറക്കി മര്‍ദിക്കുകയും ചെയ്തത്.
ബസ് ഡ്രൈവര്‍ നീലേശ്വരം സ്വദേശി സുരേഷിനെ സാരമായ പരുക്കുകളോടെ ജനറല്‍ ആശുപത്രിയില്‍ പ്രവേശിപ്പിച്ചു. അക്രമം തടയാന്‍ ശ്രമിച്ച കണ്ടക്ടര്‍ മുകേഷിനെ കയ്യേറ്റം ചെയ്യുകയും ഭീഷണിപ്പെടുത്തുകയും ചെയ്തു. ബഹളംകേട്ട് പരിസരത്തുണ്ടായിരുന്നവര്‍ ഓടിക്കൂടിയതോടെ അക്രമികള്‍ സ്ഥലംവിട്ടു. ബസ് ഓട്ടോറിക്ഷയില്‍ ഉരസിയതുമായി  ബന്ധപ്പെട്ട് വാക്കുതര്‍ക്കങ്ങള്‍ ഉണ്ടായിരുന്നു.
ഈ പ്രശ്‌നത്തിന്റെ തുടര്‍ച്ചയായാണ് ബസ് തടഞ്ഞുള്ള അക്രമം. ഓട്ടോ ഡ്രൈവര്‍ ഉള്‍പ്പെടെ കണ്ടാലറിയാവുന്ന സംഘത്തിനെതിരേ പൊലിസ് കേസെടുത്തു.