പാരിസ്: ഇറ്റാലിയന്‍ ലീഗില്‍ വിജയക്കുതിപ്പ് തുടരുകയായിരുന്ന യുവന്റസിന് സീസണിലെ ആദ്യ സമനില. ജെനോവയാണ് ഹോംഗ്രൗണ്ടണ്ടില്‍ യുവന്റസിനെ 1-1ന് സമനിലയില്‍ പൂട്ടിയത്. ഒന്‍പത് മത്സരം കളിച്ച യുവന്റസ് എട്ട് മത്സരത്തിലും വിജയം സ്വന്തമാക്കിയിരുന്നു. 18-ാം മിനുട്ടില്‍ ക്രിസ്റ്റ്യാനോ റൊണാള്‍ഡോയാണ് ഗോള്‍ നേടി യുവന്റസിനെ മുന്നിലെത്തിച്ചത്. എന്നാല്‍ 67-ാം മിനുട്ടില്‍ ഡാനിയല്‍ ബെസ്സയാണ് ജെനോവക്ക് വേണ്ടി ഗോള്‍ നേടിയത്.
ലീഗിലെ മറ്റു മത്സരങ്ങളില്‍ നാപോളി 3-0ന് ഉഡിനെസിനെയും സ്പാല്‍ 2-0ന് റോമയെയും പരാജയപ്പെടുത്തി. ജര്‍മന്‍ ലീഗില്‍ നിലവിലെ ജേതാക്കളായ ബയേണ്‍ മ്യൂണിക്ക് വിജയവഴിയില്‍ തിരിച്ചെത്തിയപ്പോള്‍ ബദ്ധവൈരികളായ ബൊറൂസിയ ഡോര്‍ട്മുണ്ടണ്ട് ജയം തുടര്‍ന്നു. ഫ്രഞ്ച് ലീഗില്‍ പി.എസ്.ജി 5-0ന് അമിയെന്‍സിനെ തകര്‍ത്തു.അതേസമയം, നാല് മത്സരങ്ങളിലെ തോല്‍വിക്കു ശേഷം കളത്തിലിറങ്ങിയ ബയേണ്‍ 3-1ന് വോള്‍ഫ്‌സ്ബര്‍ഗിനെ പരാജയപ്പെടുത്തുകയായിരുന്നു. ബയേണിനായി റോബര്‍ട്ട് ലെവന്റോസ്‌കി രണ്ടും ജെയിംസ് റോഡ്രിഗസ് ഒരു ഗോളും സ്വന്തമാക്കി. ലീഗിലെ മറ്റു മത്സരങ്ങളില്‍ ബൊറൂസ്യ ഡോട്മുണ്ടണ്ട് 4-0ന് സ്റ്റുട്ട്ഗര്‍ട്ടിനെയാണ് തകര്‍ത്തത്. 20 പോയിന്റുമായി ഡോര്‍ട്മുണ്ടാണ് പോയിന്റ് പട്ടികയില്‍ ഒന്നാമത്. ഫ്രഞ്ച് ലീഗില്‍ പി.എസ്.ജി 5-0ന് അമിയെന്‍സിനെ നിഷ്പ്രഭമാക്കുകയായിരുന്നു. മാര്‍ക്വീഞ്ഞോ, അഡ്രിയാന്‍ റാബിയോറ്റ്, ജുലിയന്‍ ഡ്രാക്‌സലര്‍, കിലിയന്‍ എംബാപ്പ, മൗസ്സ ഡിയാബി എന്നിവരാണ് പി.എസ്.ജിക്ക് വേണ്ടി ലക്ഷ്യം കണ്ടത്. ബ്രസീല്‍താരം നെയ്മറിന് പി.എസ്.ജി വിശ്രമം അനുവദിച്ചിരുന്നു. ലീഗ് സീസണില്‍ പി.എസ്.ജിയുടെ തുടര്‍ച്ചയായ 10-ാം ജയം കൂടിയായിരുന്നു കഴിഞ്ഞ ദിവസത്തേത്.
ലാലിഗയില്‍ ബാഴ്‌സലോണക്കും ഗറ്റാഫെക്കും ജയം. സെവിയക്കെതിരേ 4-2 എന്ന സ്‌കോറിനായിരുന്നു ബാഴ്‌സലോണയുടെ ജയം. രണ്ടാം മിനുട്ടില്‍ ഫിലിപ്പ് കുട്ടീഞ്ഞോയാണ് ബാഴ്‌സയുടെ ഗോള്‍ വേട്ടക്ക് തുടക്കമിട്ടത്. 12-ാം മിനുട്ടില്‍ സൂപ്പര്‍ താരം ലയണമല്‍ മെസ്സിയും ഗോള്‍നേടി. ആദ്യ പകുതിക്ക് ശേഷം ബാഴ്‌സ രണ്ട് ഗോളിന്റെ ലീഡ് നേടി. എന്നാല്‍ രണ്ടാം പകുതിക്ക് ശേഷമാണ് ഇരുടീമുകളുടെയും നാലുഗോളുകള്‍ പിറന്നത്.
63-ാം മിനുട്ടില്‍ സുവാരസ് ഗോള്‍ നേടി ബാഴ്‌സക്ക് മൂന്ന് ഗോളിന്റെ ലീഡ് സമ്മാനിച്ചു. 79-ാം മിനുട്ടില്‍ ബാഴ്‌സയുടെ സെല്‍ഫ് ഗോളിലൂടെ സെവിയ്യ ഒരു ഗോള്‍ നേടി സ്‌കോര്‍ 3-1 എന്ന നിലയിലാക്കി. 88-ാം മിനുട്ടില്‍ ഇവാന്‍ റാക്കിട്ടിച്ച് നാലാം ഗോളും നേടി ബാഴ്‌സയുടെ ഗോള്‍ പട്ടിക പൂര്‍ത്തിയാക്കി. 91-ാം മിനുട്ടില്‍ സെവിയ്യയുടെ ലൂയിസ് മ്യൂരിയല്‍ ഗോള്‍ നേടി സ്‌കോര്‍ 4-2 എന്ന നിലയിലെത്തിച്ചു. ജയത്തോടെ 18 പോയിന്റുമായി ബാഴ്‌സ പോയിന്റ് പട്ടികയില്‍ ഒന്നാമതെത്തി. 17 പോയിന്റുമായി അലാവസ് രണ്ടാം സ്ഥാനത്തും 16 പോയിന്റുമായി സെവിയ്യ മൂന്നാം സ്ഥാനത്തും നില്‍ക്കുന്നു.