സുല്‍ത്താന്‍ബത്തേരി: കല്ലൂര്‍ 66ലും പരിസര പ്രദേശങ്ങളിലുമായി രണ്ട് സ്ത്രീകളുള്‍പ്പെടെ മൂന്ന് പേര്‍ക്ക് പേപ്പട്ടിയുടെ കടിയേറ്റു. നിരവധി വളര്‍ത്തുമൃഗങ്ങളും ആക്രമണത്തിനിരയായി. പണപ്പാടി ബിജേഷ് (25), മഠത്തില്‍ രാജന്റെ ഭാര്യ പ്രകാശിനി (49), തിരുവണ്ണൂര്‍ നാരായണന്റെ ഭാര്യ സരസ്വതി (55) എന്നിവര്‍ക്കാണ് പേപ്പട്ടിയുടെ കടിയേറ്റത്. ഇവര്‍ ബത്തേരി താലൂക്ക് ആസ്പത്രിയില്‍ ചികിത്സ തേടി.
ഇന്നലെ രാവിലെയാണ് പ്രദേശത്ത് പേപ്പട്ടിയുടെ ആക്രമണം തുടങ്ങിയത്. രാവിലെ 6.30ഓടെ ക്ഷീരസംഘം ജീവനക്കാരനായ ബിജേഷിനെപേപ്പട്ടി ആക്രമിച്ചു. ഇയാളുടെ കാലിനാണ് കടിയേറ്റത്. സരസ്വതിക്കും കാലിനാണ് കടിയേറ്റത് . വീട്ടുമുറ്റത്തുവച്ചാണ് പ്രകാശിനിയെ നായ ആക്രമിച്ചത്.
ഇവരുടെ രണ്ടുകാലിനും മുറിവേറ്റിട്ടുണ്ട്. നായയുടെ ആക്രമണത്തില്‍, നിലത്തുവീണതിനെ തുടര്‍ന്ന് കൈയ്ക്കും പരുക്കുണ്ട്.
സരസ്വതിയെയും പ്രകാശിനിയെയും വിദഗ്ധ ചികിത്സയ്ക്കായി കോഴിക്കോട് മെഡിക്കല്‍ കോളേജ് ആശുപത്രിയിലേക്ക് കൊണ്ടുപോയി.