കാടാമ്പുഴ: 11ാമത് സംസ്ഥാന വാഫി കലോത്സവത്തിന്റെ സോണല്‍ മത്സരങ്ങള്‍ക്ക് തുടക്കമായി. മരവട്ടം ഗ്രേസ് വാലി കാംപസില്‍ നടന്ന സി സോണ്‍ കലോത്സവത്തോടെയാണ് സ്റ്റേജിന മത്സരങ്ങളുടെ ആദ്യ റൗണ്ടിന് തുടക്കമായത്. കലോത്സവത്തില്‍ 915 പോയിന്റ് നേടി ദാറുല്‍ ഉലൂം തൂത ഓവറോള്‍ കിരീടം നേടി. 671 പോയിന്റോടെ ദാറുറഹ്മ തൊഴിയൂര്‍ രണ്ടാം സ്ഥാനവും 390 പോയിന്റോടെ എം. ഐ. സി പുത്തന്‍ചിറ മൂന്നാം സ്ഥാനവും നേടി.
410 പോയിന്റോടെ ഊല വിഭാഗത്തിലും 407 പോയിന്റോടെ ആലിയ വിഭാഗത്തിലും ദാറുല്‍ ഉലൂം തൂത ചാംപ്യന്മാരായി. ഊല വിഭാഗത്തില്‍ 62 പോയിന്റോടെ ശാഹുല്‍ ഹമീദ് (ദാറു റഹ്മ തൊഴിയൂര്‍) കലാപ്രതിഭയായി.
സി.ഐ.സി യോട് അഫിലിയേറ്റ് ചെയ്തിട്ടുള്ള 49 വാഫി സ്ഥാപനങ്ങളില്‍ നിന്നുള്ള മത്സരാര്‍ഥികള്‍ പങ്കെടുക്കുന്ന കലോത്സവത്തിന്റെ അവശേഷിക്കുന്ന സോണല്‍ മത്സരങ്ങള്‍ വരുന്ന 24,28 തിയതികളില്‍ വെങ്ങപ്പള്ളി ശംസുല്‍ ഉലമ ഇസ്‌ലാമിക് അക്കാദമി, സഹ്‌റ പാനൂര്‍ എന്നീ സ്ഥാപനങ്ങളില്‍ നടക്കും. അടുത്ത വര്‍ഷം ജനുവരിയില്‍ കണ്ണൂരിലാണ് കലോത്സവത്തിന്റെ ഗ്രാന്‍ഡ് ഫിനാലെ അരങ്ങേറുക.
സി സോണ്‍ കലോത്സവം സി.ഐ.സി കോഡിനേറ്റര്‍ അബ്ദുല്‍ ഹകീം ഫൈസി ആദൃശേരി ഉദ്ഘാടനം ചെയ്തു . ജേതാക്കള്‍ക്കുള്ള കിരീടം കെ.കെ.എസ് തങ്ങള്‍ വെട്ടിച്ചിറ സമ്മാനിച്ചു. അഹ്മദ് വാഫി കക്കാട് മുഖ്യ പ്രഭാഷണം നടത്തി.
ഫെസ്റ്റ് കണ്‍ട്രോളര്‍ ശഫീഖ് വാഫി ഫലപ്രഖ്യാപനം നടത്തി. കെ.കെ അബ്ദുള്ള ഫൈസി കൊടശ്ശേരി, സി.എച്ച്.ബാപ്പുട്ടി തങ്ങള്‍, താജുദ്ദീന്‍ , അനീസ് നെല്ലിക്കുത്ത്, യാസര്‍ അറഫാത്ത് തുടങ്ങിയവര്‍ സംബന്ധിച്ചു.