ന്യൂഡല്‍ഹി: ബാലനീതി നിയമത്തിന്റെ മറവില്‍ യതീംഖാനകള്‍ക്ക് ഇരട്ട രജിസ്‌ട്രേഷന്‍ ഏര്‍പ്പെടുത്തിയ സര്‍ക്കാരിന്റെ നടപടി ചോദ്യംചെയ്ത് സമസ്ത കേരള ജംഇയ്യത്തുല്‍ ഉലമക്കു കീഴിലുള്ള യതീംഖാനകള്‍ സമര്‍പ്പിച്ച ഹരജിയില്‍ ഇന്നു വാദംകേള്‍ക്കും. നേരത്തെ കേസ് പരിഗണിക്കുന്നതിനിടെ സര്‍ക്കാരിനോടും യതീംഖാനകളോടും കോടതി സത്യവാങ്മൂലം സമര്‍പ്പിക്കാന്‍ ആവശ്യപ്പെട്ടിരുന്നു.
ഇതുപ്രകാരം സമസ്തക്കു കീഴിലുള്ള 120 യതീംഖാനകളിലെ സൗകര്യങ്ങളും അന്തേവാസികളുടെ വിശദാംശങ്ങളും അടങ്ങുന്ന സത്യവാങ്മൂലം നേരത്തെ സമര്‍പ്പിച്ചിട്ടുണ്ട്.
ഒന്‍പത് യതീംഖാനകളുടെ സത്യവാങ്മൂലം ഇന്ന് നല്‍കും. ഇതുള്‍പ്പെടെ പരിശോധിച്ച് കേസില്‍ അന്തിമവാദമാവും ജസ്റ്റിസ് മധന്‍ ബി. ലോക്കൂര്‍ അധ്യക്ഷനായ രണ്ടംഗ സുപ്രിംകോടതി ബെഞ്ച് മുന്‍പാകെ ഇന്നു നടക്കുക. മുതിര്‍ന്ന അഭിഭാഷകന്‍ ഹുസൈഫ അഹമദി, പി.എസ് സുല്‍ഫിക്കര്‍ അലി, മുഹമ്മദ് ത്വയ്യിബ് ഹുദവി തെന്നല എന്നിവരാണ് ഹരജിക്കാര്‍ക്കു വേണ്ടി ഹാജരാവുക.