ഗസ്സ: ഗസ്സയിലെ പൊലിസ് ചെക്ക്‌പോസ്റ്റുകള്‍ക്കു നേരെ നടന്ന രണ്ട് ചാവേര്‍ സ്‌ഫോടനങ്ങളില്‍ മൂന്നു പൊലിസ് ഓഫിസര്‍മാര്‍ കൊല്ലപ്പെട്ടു. മോട്ടോര്‍ ബൈക്കില്‍ വന്ന ചാവേറാണ് ആദ്യ സ്‌ഫോടനം നടത്തിയത്. ഇവിടെ രണ്ടു പൊലിസ് ഓഫിസര്‍മാര്‍ കൊല്ലപ്പെടുകയും ഒരു ഫലസ്തീനിക്കു പരുക്കേല്‍ക്കുകയും ചെയ്തു. ഒരു മണിക്കൂറിനകം നടന്ന രണ്ടാമത്തെ സ്‌ഫോടനത്തില്‍ ഒരു പൊലിസ് ഓഫിസര്‍ മരിക്കുകയും നിരവധിപേര്‍ക്ക് പരുക്കേല്‍ക്കുകയും ചെയ്തു.
ഇതിനു പിന്നില്‍ പ്രവര്‍ത്തിച്ചവരെ കണ്ടെത്തി ശിക്ഷിക്കുമെന്ന് ഹമാസ് നിയന്ത്രണത്തിലുള്ള ഗസ്സയിലെ ആഭ്യന്തരമന്ത്രാലയ വക്താവ് ഇയാദ് അല്‍ ബോസം പറഞ്ഞു. കനത്ത സുരക്ഷയുള്ള ഗസയില്‍ ചാവേര്‍ സ്‌ഫോടനങ്ങള്‍ അത്യപൂര്‍വമാണ്.
ഇത്തരം സംഭവങ്ങളെ ഗസ്സ അതിജീവിക്കുമെന്ന് ഹമാസ് മേധാവി ഇസ്മാഈല്‍ ഹനിയ പറഞ്ഞു. സ്‌ഫോടനത്തിനു പിന്നില്‍ ഐ.എസിനെ അന്വേഷണ ഉദ്യോഗസ്ഥര്‍ സംശയിക്കുന്നതായി റിപോര്‍ട്ടുണ്ട്.