ചേളാരി: സമസ്ത കേരള ഇസ്‌ലാം മത വിദ്യാഭ്യാസ ബോര്‍ഡിനു കീഴിലെ 9709 മദ്‌റസകളില്‍ സംഘടിപ്പിക്കുന്ന 'മിഹ്‌റജാനുല്‍ ബിദായ' മദ്‌റസാ പഠനാരംഭം ശവ്വാല്‍ 9-ന് മദ്‌റസകളില്‍ നടക്കും. കാംപയിന്‍ ഉദ്ഘാടനം മംഗളൂരുവിലെ ബെങ്കര അല്‍ മദ്‌റസത്തുദ്ദീനിയ്യയില്‍ നടക്കും. സമസ്ത കേരള ജംഇയ്യത്തുല്‍ ഉലമയുടെയും വിദ്യാഭ്യാസ ബോര്‍ഡിന്റെയും പ്രമുഖ നേതാക്കള്‍ പരിപാടിയില്‍ സംബന്ധിക്കും.
കാംപയിനോടനുബന്ധിച്ച് മദ്‌റസാതലങ്ങളില്‍ പഠനാരംഭം, പാഠപുസ്തക വിതരണം, മധുരവിതരണം, ഗുരുപരിചയം, അക്ഷരമുറ്റം തുടങ്ങിയവ നടക്കും. സമസ്ത കേരള ജംഇയ്യത്തുല്‍ മുഅല്ലിമീന്‍, എസ്.കെ.എസ്.ബി.വി സംസ്ഥാന കമ്മിറ്റികള്‍ സംഘടിപ്പിക്കുന്ന കാംപയിന് വിപുലമായ ഒരുക്കങ്ങള്‍ നടക്കുന്നുണ്ട്. മദ്‌റസയുടെ അക്ഷരമുറ്റത്തേക്ക് കടന്നുവരുന്ന നവാഗതര്‍ക്ക് അവിസ്മരണീയമാകുംവിധം ചടങ്ങുകള്‍ വിജയിപ്പിക്കുന്നതിന് കര്‍മരംഗത്തിറങ്ങണമെന്ന് സുന്നി ബാലവേദി സംസ്ഥാനകമ്മിറ്റി അഭ്യര്‍ഥിച്ചു.