പരപ്പനങ്ങാടി: ഓട്ടോറിക്ഷയും ബൈക്കും സാമൂഹ്യവിരുദ്ധര്‍ തീയിട്ടു നശിപ്പിച്ചു. ചാപ്പപ്പടി കണ്ടംകൂട്ട് പറമ്പിലെ മുസ്‌ലിം ലീഗ് പ്രവര്‍ത്തകനായ പുത്തന്‍കമ്മുവിന്റെ ഹുസൈന്റെ വീട്ടുമുറ്റത്ത് നിര്‍ത്തിയിട്ട ബുള്ളറ്റും ആവിയില്‍ ബീച്ചിലെ സി.പി.എം പ്രവര്‍ത്തകനായ കുന്നുമ്മല്‍ ജാഫറിന്റെ റ്റാറ്റ എയ്‌സ് ടാക്‌സി ഓട്ടോറിക്ഷയുമാണ് സാമൂഹ്യവിരുദ്ധര്‍ തീയിട്ടു നശിപ്പിച്ചത്.
ഇന്നലെ പുലര്‍ച്ചെ രണ്ടരയോടെയാണ് സംഭവം. ഹുസൈന്റെ ടെറസ് വീടിന്റെ മുന്‍ഭാഗവും കത്തിയിട്ടുണ്ട്. ശക്തമായ ചൂടും ജനലിന്റെ ഗ്ലാസ് പൊട്ടിയ ശബ്ദവും കാരണം ഞെട്ടിയുണര്‍ന്ന വീട്ടുകാര്‍ വെള്ളം ഒഴിച്ച് തീ അണയ്ക്കുകയായിരുന്നു. ജാഫറിന്റെ വീട്ടുകാര്‍ മൂന്നോടെ പുറത്തേക്കിറങ്ങിയപ്പോള്‍ ഓട്ടോ പൂര്‍ണമായും കത്തിനശിച്ച നിലയിലായിരുന്നു. ഇതിന് തൊട്ടടുത്തെ വീട്ടിലെ യൂത്ത് ലീഗ് പ്രവര്‍ത്തകന്‍ പള്ളിക്കണ്ടി സിദ്ധീഖിന്റെ ഹാന്‍ഡ് ലോക്കിട്ട അപ്പാച്ചി ബൈക്കും കാണാതായിട്ടുണ്ട്. കഴിഞ്ഞ ദിവസങ്ങളില്‍ ഒട്ടുമ്മല്‍ മുസ്‌ലിം ലീഗ് ഓഫിസും പതാകകളും തകര്‍ക്കുകയും റോഡരികിലുണ്ടായിരുന്ന സി.പി.എമ്മിന്റെയും ലീഗിന്റെയും സ്തൂപങ്ങളും കൊടികളും നശിപ്പിക്കുകയും ചെയ്തിരുന്നു. പരപ്പനങ്ങാടി പൊലിസ് സംഭവസ്ഥലങ്ങള്‍ സന്ദര്‍ശിച്ചു അന്വേഷണം ആരംഭിച്ചു. പി.കെ അബ്ദുറബ്ബ് എം.എല്‍.എ രാഷ്ട്രീയ പാര്‍ട്ടി പ്രതിനിധികളും സംഭവസ്ഥലത്ത് സന്ദര്‍ശനം നടത്തി സ്ഥിഗതികള്‍ വിലയിരുത്തി.