മലപ്പുറം: സുന്നി യുവജന സംഘം ജില്ലാ കമ്മിറ്റിയുടെ ആഭിമുഖ്യത്തില്‍ എല്ലാ വര്‍ഷവും നടക്കാറുള്ള മീലാദ് വിളംബര റാലി നവംബര്‍ ഏഴിന് മലപ്പുറത്ത് നടക്കും. മുഹമ്മദ് നബി; അനുപമ വ്യക്തിത്വം എന്ന പ്രമേയത്തില്‍ ഒരു മാസക്കാലം നീണ്ടു നില്‍ക്കുന്ന റബീഅ' കാംപയിന്റെ ഭാഗമായി സംസ്ഥാനത്തു നടക്കുന്ന വിവിധ പരിപാടികളുടെ ജില്ലാതല ഉദ്ഘാടനം റാലിക്കു ശേഷമുള്ള സമ്മേളനത്തില്‍ നടക്കും. അസ്ര്‍ നിസ്‌കാരശേഷം കുന്നുമ്മല്‍ കലക്ടറുടെ ബംഗ്ലാവ് പരിസരത്തു നിന്നാരംഭിക്കുന്ന റാലി കിഴക്കേതല സുന്നി മഹല്‍ ജങ്ഷനില്‍ സമാപിക്കും. സമസ്തയുടെയും പോഷക ഘടകങ്ങളുടെയും നേതാക്കളും പ്രവര്‍ത്തകരും റാലിയിലും സമ്മേളനത്തിലും അണിനിരക്കും. സ്ഥാനവസ്ത്രമണിഞ്ഞ ആമില അംഗങ്ങള്‍ റാലിയുടെ മുന്‍നിരയിലും മഹല്ലു തലങ്ങളില്‍ നിന്ന് ഒഴുകിയെത്തുന്ന ആയിരങ്ങള്‍ ആമിലകള്‍ക്കു പിന്നിലായും പങ്കെടുക്കും.
മൗലിദ് പാരായണത്തോടെ ആരംഭിക്കുന്ന മീലാദ് സമ്മേളനത്തില്‍ പ്രമുഖര്‍ സംബന്ധിക്കും. ഇതു സംബന്ധമായി സുന്നി മഹലില്‍ ചേര്‍ന്ന ജില്ലാ ഭാരവാഹികളുടെയും മണ്ഡലം സെക്രട്ടറിമാരുടെയും യോഗത്തില്‍ സയ്യിദ് കെ.കെ.എസ് തങ്ങള്‍ അധ്യക്ഷനായി.