പ്യോങ്‌യാങ്: ഉത്തര കൊറിയ വീണ്ടും മിസൈല്‍ പരീക്ഷണം നടത്തി. നാല് കപ്പല്‍വേധ മിസൈലുകളാണ് കഴിഞ്ഞ ദിവസം തെക്കന്‍ കൊറിയന്‍ കടലിലേക്ക് ഉ.കൊറിയ തൊടുത്തുവിട്ടത്. യു.എന്നിന്റെയും അമേരിക്കയുടെയും നിരന്തര ഭീഷണികളെ വെല്ലുവിളിച്ചാണ് ഉ.കൊറിയ ശക്തിപ്രകടനം തുടരുന്നത്.
ഒരു മാസത്തിനിടെ ഇതു നാലാമത്തെ മിസൈല്‍ പരീക്ഷണമാണ് ഉ.കൊറിയ നടത്തിയത്. ഈ വര്‍ഷം ഇതുവരെ പത്തോളം അവസരങ്ങളിലായി വിവിധ തരത്തിലുള്ള 16 മിസൈലുകളാണ് ഉ.കൊറിയ പരീക്ഷിച്ചത്. ദക്ഷിണ കൊറിയയില്‍ മിതവാദിയായ മൂണ്‍ ജെ. ഇന്‍ അധികാരമേറ്റ ശേഷം ഇത് നാലാമത്തേതാണ്.
കിഴക്കന്‍ തുറമുഖ നഗരമായ വോന്‍സാനില്‍ നിന്നു വിക്ഷേപിച്ച നാലു മിസൈലുകള്‍ അത്യാധുനിക ശേഷിയുള്ള കപ്പല്‍വേധ ക്രൂയിസ് മിസൈലുകളാണെന്ന് ദക്ഷിണ കൊറിയ ആരോപിച്ചു.