ജിദ്ദ: അറബ് ലോകത്ത് ഏറ്റവുമധികം കരുതല്‍ സ്വര്‍ണ ശേഖരമുള്ള രാജ്യമായി സഊദി മാറി. രജ്യത്തുള്ള കരുതല്‍ സ്വര്‍ണശേഖരം 323.07 ടണ്‍ ആയി ഉയര്‍ന്നതായി അന്താരാഷ്ട്ര നാണയ നിധിയുടെ ഏറ്റവും പുതിയ കണക്കുകള്‍ വ്യക്തമാക്കുന്നു. ആഗോള തലത്തില്‍ ഏറ്റവും കൂടുതല്‍ കരുതല്‍ സ്വര്‍ണ ശേഖരമുള്ള രാജ്യങ്ങളുടെ പട്ടികയില്‍ സഊദി അറേബ്യ 15 ാം സ്ഥാനത്താണ്.

അറബ് ലോകത്ത് രണ്ടാം സ്ഥാനത്ത് ലബനോന്‍ ആണ്. ലബനോനില്‍ 268.8 ടണ്‍ കരുതല്‍ സ്വര്‍ണ ശേഖരമുണ്ട്. ആഗോള തലത്തില്‍ ലബനോന്റെ സ്ഥാനം 19 ആണ്. ലോകത്ത് ഏറ്റവുമധികം കരുതല്‍ സ്വര്‍ണ ശേഖരമുള്ള ആദ്യത്തെ ഇരുപത് രാജ്യങ്ങളുടെ പട്ടികയില്‍ മറ്റു അറബ് രാജ്യങ്ങളൊന്നുമില്ല.
ലോകത്ത് ഏറ്റവും കൂടുതല്‍ കരുതല്‍ സ്വര്‍ണ ശേഖരമുള്ളത് അമേരിക്കയിലാണ്. അമേരിക്കയില്‍ 8,133.53 ടണ്‍ സ്വര്‍ണ ശേഖരമുണ്ട്. രണ്ടാം സ്ഥാനത്ത് ജര്‍മനിയാണ്. 3367.95 ടണ്‍ സ്വര്‍ണം.

ഇറ്റലിയുടെ പക്കല്‍ 2451.85 ടണ്‍ സ്വര്‍ണത്തിന്റെയും നാലാം സ്ഥാനത്തുള്ള ഫ്രാന്‍സിന്റെ പക്കല്‍ 2436.06 ടണ്‍ സ്വര്‍ണത്തിന്റെയും അഞ്ചാം സ്ഥാനത്തുള്ള റഷ്യയുടെ പക്കല്‍ 2207.01 ടണ്‍ സ്വര്‍ണത്തിന്റെയും ആറാം സ്ഥാനത്തുള്ള ചൈനയുടെ പക്കല്‍ 1916.29 ടണ്‍ സ്വര്‍ണത്തിന്റെയും ഏഴാം സ്ഥാനത്തുള്ള സ്വിറ്റ്‌സര്‍ലാന്റിന്റെ പക്കല്‍ 1040.91 ടണ്‍ സ്വര്‍ണത്തിന്റെയും കരുതല്‍ ശേഖരമുണ്ട്. ലോകത്ത് ഏഴു രാജ്യങ്ങളുടെ പക്കലാണ് ആയിരം ടണ്ണില്‍ കൂടുതല്‍ കരുതല്‍ സ്വര്‍ണ ശേഖരമുള്ളത്.