ന്യൂഡല്‍ഹി: കശ്മീരില്‍ എല്ലാം നിയന്ത്രണവിധേയമായെന്ന് അനുദിനം പറയുന്ന കേന്ദ്രസര്‍ക്കാരിനും ആത്മവിശ്വാസത്തില്‍ കുറവുവരുന്നുവെന്ന സൂചന നല്‍കി പുതിയ നടപടി. കശ്മീരിന്റെ പ്രത്യേക അധികാരം എടുത്തകളഞ്ഞതിന് ശേഷം സംസ്ഥാനത്ത് ഒക്ടോബറില്‍ എട്ടോളം വിദേശ രാഷ്ട്രങ്ങളെ പങ്കെടുപ്പിച്ച് വലിയ നിക്ഷേപ സംഗമം നടത്തുമെന്ന് ദിവസങ്ങള്‍ക്ക് മുന്‍പ് ഭരണകൂടം പറഞ്ഞിരുന്നു. കശ്മീര്‍ ഭരണനിര്‍വഹണ ചുമതല വഹിക്കുന്നവരില്‍ പ്രധാനിയായ എന്‍.കെ ചൗധരിയാണ് ഏവരുടെയും ശ്രദ്ധയാകര്‍ച്ച ഈ പ്രഖ്യാപനം നടത്തിയത്.

എന്നാല്‍ ഈ പരിപാടി ഇപ്പോള്‍ മാറ്റിവച്ചതായാണ് ലഭിക്കുന്ന സൂചന. അങ്ങനെയെങ്കില്‍ കശ്മീരില്‍ നടക്കുന്ന സംഭവ വികാസങ്ങള്‍ സര്‍ക്കാര്‍ കരുതിയ രീതിയില്‍ അല്ലെന്നും തന്നെയാണ് ഈ നടപടിയിലൂടെ വ്യക്തമാകുന്നത്. ചരിത്രത്തില്‍ ആദ്യമായി കശ്മീരില്‍ നടക്കാന്‍ പോകുന്ന അന്താരാഷ്ട്ര പരിപാടിയാണിതൈന്നും പരിപാടിയുടെ തിയതി പോലും പുറത്തുവിടുന്നത് ഇവിടുത്തെ സ്ഥിതിഗതികള്‍ പൂര്‍ണമായും നിയന്ത്രണവിധേയമാണെന്നതുകൊണ്ടാണെന്നും അന്ന് ചൗധരി പറഞ്ഞിരുന്നു. എന്നാല്‍ സ്ഥിതിഗതികള്‍ കലുഷിതമായ സാഹചര്യത്തിലാണ് ഏവരുടെയും ശ്രദ്ധയാകര്‍ഷിച്ച പരിപാടി മാറ്റിവക്കാന്‍ ശ്രമം നടക്കുന്നതെന്നും വ്യക്തമാണ്.

കശ്മീരിന്റെ പ്രത്യേക പദവി എടുത്തുകളഞ്ഞ സര്‍ക്കാര്‍ നീക്കത്തിനെതിരേ സമര്‍പ്പിച്ച ഹരജികള്‍ ഒക്ടോബര്‍ ആദ്യവാരം പരിശോധിക്കുമെന്ന് സുപ്രിം കോടതി പറഞ്ഞിരുന്നു. പന്ത്രണ്ടിലധികം ഹരജികളാണ് നടപടിയുമായി ബന്ധപ്പെട്ട് സുപ്രിം കോടതിയില്‍ സമര്‍പ്പിച്ചിട്ടുള്ളത്. കോടതിയുടെ പെട്ടെന്നുള്ള ഇടപെടലും കേന്ദ്രസര്‍ക്കാരിന് തിരിച്ചടിയായിട്ടുണ്ട്. കശ്മീരില്‍ നടക്കുന്ന പ്രതിഷേധങ്ങള്‍ സംബന്ധിച്ച് ചില വിദേശ മാധ്യമങ്ങള്‍ റിപ്പോര്‍ട്ട് ചെയ്തപ്പോള്‍ അതെല്ലാം വ്യാജവാര്‍ത്തകളാണെന്നാണ് സര്‍ക്കാര്‍ വൃത്തങ്ങള്‍ അറിയിച്ചത്. എന്നാല്‍ പിന്നീട് അത് തിരുത്തിക്കൊണ്ട് കേന്ദ്രസര്‍ക്കാരിന് തന്നെ രംഗത്ത് വരേണ്ടി വന്നു.