ഇരിട്ടി: ഇരിട്ടിയില്‍ വീടിന്റെ പൂട്ടുതകര്‍ത്ത് വന്‍ മോഷണശ്രമം. നേരംപോക്ക് പ്രഗതി കോളജിന് സമീപത്തെ ഇരിട്ടി ഹയര്‍സെക്കന്‍ഡറി സ്‌കൂള്‍ റിട്ട. കായികാധ്യാപകന്‍ എം. രമേശന്റെ വീട്ടിലാണ് മോഷണശ്രമം നടന്നത്.
വീടിന്റെ മുന്‍ വാതിലിന്റെ പൂട്ട് തകര്‍ത്ത കള്ളന്‍ വീടിനകത്തുണ്ടായിരുന്ന അഞ്ച് അലമാരകളും മേശകളും മറ്റും കുത്തിത്തുറന്ന് അതിലുണ്ടായിരുന്ന സാധനങ്ങള്‍ മുഴുവന്‍ വാരി വലിച്ചിട്ട നിലയിലാണ്.
എന്നാല്‍ സ്വര്‍ണമോ പണമോ വീട്ടില്‍ സൂക്ഷിക്കാത്തതുകൊണ്ടുതന്നെ ഒന്നും നഷ്ടമായിട്ടില്ലെന്നാണ് കരുതുന്നത്. സോഫ്റ്റ്‌ബോള്‍ ചാംപ്യന്‍ഷിപ്പുമായി ബന്ധപ്പെട്ട് കഴിഞ്ഞ ഹര്‍ത്താല്‍ ദിനമായ 17ന് വൈകിട്ട് കാസര്‍കോട്ടേക്കു പോയ രമേശന്‍ ഞായറാഴ്ച അര്‍ധരാത്രിയോടെ വീട്ടില്‍ എത്തിയപ്പോഴാണ് വീടിന്റെ പൂട്ട് തകര്‍ത്തതായി കണ്ടത്.
വിവരമറിയിച്ചതിനെ തുടര്‍ന്ന് ഇരിട്ടി പൊലിസ് സ്ഥലത്തെത്തി അന്വേഷണം നടത്തി.
വീടിനെക്കുറിച്ച് അറിയാവുന്നവരാണു മോഷണത്തിനു പിന്നിലെന്നാണു പൊലിസ് നിഗമനം. അഞ്ചുമാസം മുന്‍പും ഇവിടെ കളവിനുള്ള ശ്രമം നടന്നിരുന്നു. അന്നു മുകളിലെ നിലയിലെ ഗ്‌ളാസ് തകര്‍ത്ത് അകത്തുകടന്നാണ് മോഷണത്തിനു തുനിഞ്ഞത്. താഴത്തെ നിലയിലേക്ക് എത്താന്‍ കഴിയാഞ്ഞതാണ് അന്നു മോഷണശ്രമം പരാജയപ്പെട്ടത്.
അതേസമയം ഇരിട്ടി മേഖലയില്‍ മോഷണം പെരുകിവരികയാണ്. കഴിഞ്ഞ ഏതാനും ആഴ്ചയ്ക്കുള്ളില്‍ മേഖലയില്‍ നിരവധി മോഷണങ്ങളാണു നടന്നത്. മലബാര്‍ ആശുപത്രിയില്‍ നിന്നുള്ള സ്വര്‍ണം, കീഴൂര്‍കുന്നിലെ ടാറ്റയുടെ ഷോറൂമിലും അധ്യാപകനായ രമേശന്റെ വീടിനുസമീപത്തെ വാടക വീട്ടിലും, പുന്നാട് ക്ഷേത്രത്തിലും മറ്റും പണം കവര്‍ന്നതും അടുത്ത ദിവസങ്ങളിലാണ്. മേഖലയില്‍ പൊലിസിന്റെ ശക്തമായ നിരീക്ഷണം ആവശ്യമാണെന്നാണ് ജനങ്ങള്‍ ആവശ്യപ്പെടുന്നത്.