സിയൂള്‍: ഫിഫ അണ്ടര്‍ 20 ലോകകപ്പില്‍ പുതിയ ചാംപ്യനെ ലഭിക്കും. ഫൈനലില്‍ ഇംഗ്ലണ്ട്- വെനസ്വല പോരാട്ടത്തിന് അരങ്ങൊരുങ്ങിയതോടെയാണ് പുതിയ ചാംപ്യന്‍ പിറക്കാനുള്ള അവസരവുമൊരുങ്ങിയത്. ഇരു ടീമുകളും കന്നി അണ്ടര്‍ 20 ലോകകപ്പ് ഫൈനലിലേക്കാണ് യോഗ്യത നേടിയത്. സെമി ഫൈനലില്‍ ഇറ്റലിയെ 3-1ന് തകര്‍ത്താണ് ഇംഗ്ലീഷ് മുന്നേറ്റം. ഉറുഗ്വെയെ പെനാല്‍റ്റി ഷൂട്ടൗട്ടിലേക്ക് നീണ്ട പോരാട്ടത്തില്‍ 4-3ന് തകര്‍ത്താണ് വെനസ്വലയുടെ ഫൈനല്‍ പ്രവേശം.
കളി തുടങ്ങി രണ്ടാം മിനുട്ടില്‍ തന്നെ ഒര്‍സോലിനിയുടെ ഗോളില്‍ അസൂറികള്‍ മുന്നിലെത്തി. എന്നാല്‍ രണ്ടാം പകുതിയില്‍ മൂന്ന് ഗോളുകള്‍ തിരിച്ചടിച്ചാണ് ഇംഗ്ലണ്ട് വിജയം സ്വന്തമാക്കിയത്. 66, 88 മിനുട്ടുകളില്‍ വല ചലിപ്പിച്ച് ഇരട്ട ഗോളുകളുമായി ഇംഗ്ലണ്ട് താരം സോളങ്കെ കളിയില്‍ നിര്‍ണായക സ്വാധീനം ചെലുത്തിയപ്പോള്‍ 77ാം മിനുട്ടില്‍ ലുക്മാനും ഇംഗ്ലണ്ടിനായി ഗോള്‍ നേടി.
ഉറുഗ്വെയും വെനസ്വലയും തമ്മിലുള്ള പോരാട്ടം ആവേശം അവസാന നിമിഷം വരെ നിലനില്‍ക്കുന്നതായിരുന്നു. ആദ്യ പകുതി ഗോള്‍രഹിതമായപ്പോള്‍ രണ്ടാം പകുതി തുടങ്ങി 49ാം മിനുട്ടില്‍ ഡെ ല ക്രൂസിന്റെ പെനാല്‍റ്റിയില്‍ ഉറുഗ്വെ മുന്നിലെത്തി. മത്സരം ഉറുഗ്വെ സ്വന്തമാക്കുമെന്ന പ്രതീതിയായിരുന്നു അവസാനം വരെ. എന്നാല്‍ 90 മിനുട്ടും കഴിഞ്ഞ് ലഭിച്ച ഇഞ്ച്വറി ടൈമില്‍ സോസ നേടിയ ഗോള്‍ വെനസ്വലയുടെ ആയുസ് നീട്ടി. മത്സരം നിശ്ചിത സമയത്തും അധിക സമയത്തും 1-1ന് സമനിലയില്‍ അവസാനിച്ചപ്പോള്‍ ഫലം നിര്‍ണയം പെനാല്‍റ്റി ഷൂട്ടൗട്ടിലേക്ക് നീണ്ടു. വെനസ്വല നാല് ഗോളുകള്‍ വലയിലാക്കിയപ്പോള്‍ ഉറുഗ്വെ മൂന്ന് ഗോളുകളാണ് നേടിയത്. ഉറുഗ്വെ താരം ഡെ ല ക്രൂസിന്റെ അവസാന കിക്ക് തടുത്തിട്ട് വെനസ്വല ഗോള്‍ കീപ്പര്‍ ഫരിനെസ് വിജയ നായകനായി. ആദ്യ ഗോള്‍ നേടി ടീമിന് ലീഡ് സമ്മാനിച്ച് ഹീറോയായ ക്രൂസ് അവസാന കിക്ക് പാഴാക്കി വില്ലനുമായി.
ഈ മാസം 11ന് നടക്കുന്ന ഫൈനലില്‍ ഇംഗ്ലണ്ട്- വെനസ്വല പോരാട്ടം അരങ്ങേറും. 11ന് ആദ്യം നടക്കുന്ന മത്സരത്തില്‍ മൂന്നാം സ്ഥാനത്തിനായി ഉറുഗ്വെ- ഇറ്റലിയുമായി ഏറ്റുമുട്ടും.