അസ്താന (ഖസാകിസ്താന്‍): മുറുകി വരുന്ന വൈര്യം മറന്ന് പരസ്പരം കുശലം പറഞ്ഞും തമാശകള്‍ പങ്കുവെച്ചും ഇന്ത്യന്‍ പ്രധാനമന്ത്രി നരേന്ദ്രമോദിയും പാകിസ്താന്‍ പ്രധാനമന്ത്രി നവാസ് ശരീഫും ഖസാക്കിസ്താനില്‍. മോദിയുടെ ഖസാക്കിസ്താന്‍ സന്ദര്‍ശനത്തിനിടെ തികച്ചും അപ്രതീക്ഷിതമായാണ് ഇരുപ്രധാനമന്ത്രിമാരും കണ്ടുമുട്ടിയത്. ഖസാകിസ്താന്‍ പ്രസിഡന്റ് നൂര്‍സുല്‍ത്താന്‍ നസര്‍ബയേവുമായി ചര്‍ച്ച നടത്തിയ ശേഷം അസ്താന ഓപറ ഹൗസിലെ ലീഡേഴ്‌സ് ലോഞ്ചില്‍ എത്തിയതായിരുന്നു മോദി.

2015ലെ മോദിയുടെ ലാഹോര്‍ സന്ദര്‍ശനത്തിനു ശേഷമുള്ള ആദ്യകൂടിക്കാഴ്ചയാണിത്. ഇരു രാഷ്ട്ര തലവന്‍മാരും പരസ്പരം കുശലാന്വേഷണങ്ങള്‍ നടത്തിയതായാണ് റിപ്പോര്‍ട്ട്. ശരീഫിന്റെ ആരോഗ്യത്തെക്കുറിച്ചും കുടുംബത്തെക്കുറിച്ചും മോദി ചോദിച്ചറിഞ്ഞതായും വാര്‍ത്താ ഏജന്‍സി റിപ്പോര്‍ട്ട് ചെയ്യുന്നു.

ഷാങ്ഹായ് സഹകരണ സമിതി ഉച്ചകോടിയില്‍ പങ്കെടുക്കുന്നതിനാണ് നരേന്ദ്ര മോദി ഖസാകിസ്താനിലെത്തിയത്. ചൈനീസ് പ്രസിഡന്റ് സി ജന്‍പിങ്ങുമായും മോദി കൂടിക്കാഴ്ച നടത്തുന്നുണ്ട്. ഷാങ്ഹായ് സഹകരണ സമിതിയില്‍ ഇപ്പോള്‍ നിരീക്ഷണ പദവി മാത്രമാണ് ഇപ്പോള്‍ ഇന്ത്യയ്ക്കും പാകിസ്താനുമുള്ളത്.