കോഴിക്കോട്: ശബരിമല വിഷയം കൈകാര്യം ചെയ്യുന്നതില്‍ സംസ്ഥാന സര്‍ക്കാരിന് പാളിച്ചയുണ്ടായെന്ന് കോണ്‍ഗ്രസ് നേതാവും എം.പിയുമായ ശശിതരൂര്‍. ആള്‍ ഇന്ത്യ പ്രൊഫഷണല്‍ കോണ്‍ഗ്രസ് കോഴിക്കോട് ചാപ്റ്റര്‍ സംഘടിപ്പിച്ച ചടങ്ങില്‍ സംസാരിക്കുകയായിരുന്നു അദ്ദേഹം.

കേന്ദ്രസര്‍ക്കാരിന്റെ കൊള്ളരുതായ്മകളെ മറയാക്കാനാണ് ബി.ജെ.പി ശബരിമല വിഷയം ഉയര്‍ത്തിക്കൊണ്ടുവരുന്നത്. ബോധപൂര്‍വമായ നാടകമാണ് ഈ വിഷയത്തില്‍ ബി.ജെ.പി നടത്തുന്നത്. ഓരോ തവണയും നട തുറക്കുമ്പോള്‍ ബി.ജെ.പി ഈ പ്രശ്‌നത്തെ ഉയര്‍ത്തിക്കൊണ്ടുവരും. പ്രളയദുരിതാശ്വാസത്തിലടക്കം കേന്ദ്രം കേരളത്തോട് കാണിച്ച ദ്രോഹം കാരണം ജനപ്രീതി നഷ്ടമായ ബി.ജെ.പി ശബരിമല വിഷയം കത്തിക്കുകയാണ്.

പെട്രോളിനും ഡീസലിനും വില കൂട്ടി ജനവിരുദ്ധരായവര്‍ ശബരിമലയുടെ സമാധാനം തകര്‍ക്കുകയാണ്. യഥാര്‍ഥ പ്രശ്‌നങ്ങളെക്കുറിച്ച് ബി.ജെ.പിക്ക് ബോധമില്ല. രാമേക്ഷത്രമടക്കമുള്ള വിഷയങ്ങളിലാണ് അവര്‍ക്ക് താല്‍പര്യം. വിവാദങ്ങളിലേക്ക് കാലെടുത്ത് വെക്കാന്‍ താല്‍പര്യമില്ലാത്തതിനാല്‍ ഇക്കാര്യത്തില്‍ കൂടുതല്‍ അഭിപ്രായം പറയാനില്ലെന്നും തരൂര്‍ കൂട്ടിച്ചേര്‍ത്തു.  

കേരളത്തിലെ കോണ്‍ഗ്രസിന്റെ ഗ്രൂപ്പിസം ആശയപരമല്ല. വ്യക്തിപരമായ കാര്യമാണ്. വി.എം സുധീരന്‍ കെ.പി.സി.സി പ്രസിഡന്റായപ്പോള്‍ സുധീരന്‍ ഗ്രൂപ്പ് വരെ ഉണ്ടായിട്ടുണ്ട്. രാജ്യത്ത് കോണ്‍ഗ്രസിനെ പുനരുജ്ജീവിപ്പിക്കാന്‍ രാഹുല്‍ ശ്രമിച്ചു കൊണ്ടിരിക്കുകയാണ്. ബി.ജെ.പിയെ താഴെയിറക്കാന്‍ പുതിയതന്ത്രങ്ങളാണ് അദ്ദേഹം മെനയുന്നത്.

ഉത്തര്‍പ്രദേശിലടക്കം ബി.ജെ.പിക്ക് സീറ്റ് കുറയും. രാജ്യത്തെ പ്രൊഫഷണലുകളുടെ അഭിപ്രായം കൂടി പരിഗണിച്ചാവും  കോണ്‍ഗ്രസ് പ്രകടനപത്രിക തയാറാക്കുകയെന്ന് മാനിഫസ്റ്റോ കമ്മറ്റി അംഗം കൂടിയായ ശശി തരൂര്‍ പറഞ്ഞു. അമേരിക്കയിലെ പ്രസിഡന്‍ഷ്യല്‍ രീതിയിലുള്ള ജനാധിപത്യമല്ല ഇന്ത്യയില്‍. രാഹുലിനെയും പ്രധാനമന്ത്രി നരേന്ദ്ര മോദിയെയും പാര്‍ലമെന്ററി ജനാധിപത്യ നിലനില്‍ക്കുന്ന  ഇന്ത്യില്‍ താരതമ്യം ചെയ്യുന്നതില്‍ അര്‍ഥമില്ലെന്നും അദ്ദേഹം കൂട്ടിച്ചേര്‍ത്തു. അഖിലേന്ത്യ പ്രൊഫഷണല്‍ കോണ്‍ഗ്രസ് ഭാരവാഹികളായ ആനന്ദ മണി, സുധീര്‍ മോഹന്‍ എന്നിവരും ചടങ്ങില്‍ പെങ്കടുത്തു.