കോട്ടയം: പാലാ ഉപതെരഞ്ഞെടുപ്പിലെ സ്ഥാനാര്‍ഥി നിര്‍ണയത്തില്‍ പി.ജെ ജോസഫ് ഇടപെടേണ്ടതില്ലെന്ന യൂത്ത് ഫ്രണ്ടിന്റെ ആരോപണത്തിനുപിന്നാലെ ജയസാധ്യതയുള്ള സ്ഥാനാര്‍ഥിക്ക് മാത്രമേ കേരള കോണ്‍ഗ്രസിന്റെ ഔദ്യോഗിക ചിഹ്നമായ രണ്ടില നല്‍കൂവെന്ന് പാര്‍ട്ടി ചെയര്‍മാന്‍ പി.ജെ ജോസഫ് പ്രഖ്യാപിച്ചു. ജയ സാധ്യതക്കാണ് പാര്‍ട്ടി മുഖ്യ പരിഗണന നല്‍കുന്നത്. ഞായറാഴ്ച സ്ഥാനാര്‍ഥിയെ പ്രഖ്യാപിക്കുമെന്നും പി.ജെ ജോസഫ് മാധ്യമങ്ങളോട് പറഞ്ഞു. എന്നാല്‍ മാണി കുടുംബത്തില്‍ നിന്നുള്ള സ്ഥാനാര്‍ഥിവേണമെന്ന ആവശ്യത്തോട് ജോസഫ് പ്രതികരിച്ചില്ല.
പി.ജെ ജോസഫായിരിക്കും കേരള കോണ്‍ഗ്രസ് സ്ഥാനാര്‍ഥിയെ പ്രഖ്യാപിക്കുകയെന്ന് ജോയ് എബ്രഹാം അറിയിച്ചു.

കെ.എം മാണിയുടെ കുടുംബത്തില്‍ നിന്ന് സ്ഥാനാര്‍ഥിയെ വേണമെന്നാണ് ജോസ് കെ.മാണി വിഭാഗത്തിന്റെ ആവശ്യം. ജോസ് കെ. മാണി മത്സരിക്കേണ്ടെന്നാണ് യു.ഡി.എഫ് ആവശ്യം. ആ നിലക്ക് നിഷ ജോസിനെ സ്ഥാനാര്‍ഥിയാക്കണമെന്ന സമ്മര്‍ദവുമായി ജോസ്.കെ മാണി വിഭാഗം ശക്തമായി രംഗത്തുമുണ്ട്. ഈ അവസരത്തിലാണ് ജോസഫിന്റെ പ്രതികരണം.