തിരുവനന്തപുരം: ജനറല്‍ ആശുപത്രിയെ അംഗപരിമിത സൗഹൃദമാക്കാന്‍ ആവശ്യമായ നടപടികള്‍ ഉടന്‍ സ്വീകരിക്കാന്‍ സംസ്ഥാന അംഗപരിമിത കമ്മിഷണര്‍ ഡോ. ജി. ഹരികുമാര്‍ നിര്‍ദേശം നല്‍കി. ആശുപത്രി സന്ദര്‍ശിച്ച് അംഗപരിമിതര്‍ക്ക് ആവശ്യമായ സൗകര്യങ്ങള്‍ ആശുപത്രിയിലുണ്ടോയെന്ന് പരിശോധിച്ചതിനുശേഷമാണ് നിര്‍ദേശം. ആശുപത്രി സൂപ്രണ്ടിന്റെ ഓഫിസ് ഉടന്‍ താഴത്തെ നിലയിലേക്ക് മാറ്റണമെന്നും കമ്മിഷണര്‍ പറഞ്ഞു.
ഇതിനാവശ്യമായ ഉത്തരവ് നല്‍കുമെന്ന് സൂപ്രണ്ട് ഡോ. വി.ആര്‍. വനജയെ അറിയിച്ചു. പ്രധാന കെട്ടിടത്തിലേക്ക് കടന്നു വരുന്നിടത്ത് റാമ്പുകള്‍ നിര്‍മിക്കണം. ജനറല്‍ ആശുപത്രിയില്‍ നിന്ന് അംഗപരിമിത സര്‍ട്ടിഫിക്കറ്റ് ലഭിക്കുന്നത് സംബന്ധിച്ച് പരാതിയുള്ളവര്‍ക്ക് സൂപ്രണ്ടിനെ കാണാന്‍ ഒന്നാമത്തെ നിലയിലേക്ക് ചെറിയ പടികള്‍ കയറി വരാന്‍ ബുദ്ധിമുട്ടാണ്. അംഗപരിമിത മെഡിക്കല്‍ ബോര്‍ഡ് ചേരുന്ന കെട്ടിടത്തില്‍ ഇവര്‍ക്കിരിക്കാന്‍ ആവശ്യത്തിന് കസേരകളുണ്ടാവണം. കുടിക്കാന്‍ വെള്ളവും അംഗപരിമിത സൗഹൃദ ടോയിലറ്റും ഉണ്ടാവണം. ആശുപത്രിയില്‍ പണിപൂര്‍ത്തിയാകുന്ന കെട്ടിടത്തിന്റെ താഴത്തെ നിലയില്‍ മെഡിക്കല്‍ ബോര്‍ഡ് ചേരാനുള്ള സൗകര്യമൊരുക്കണം. ആശുപത്രിയുടെ മുന്‍ഭാഗത്തെ കെട്ടിടത്തിലേക്ക് അംഗപരിമിത ഒ.പി മാറ്റുന്നത് പരിഗണിക്കാന്‍ സൂപ്രണ്ടിന് നിര്‍ദേശം നല്‍കുമെന്ന് കമ്മീഷണര്‍ അറിയിച്ചു. മെഡിക്കല്‍ ബോര്‍ഡ് മുമ്പാകെയെത്തിയവരില്‍ നിന്ന് പരാതികള്‍ കേട്ടു. ഫിസിയോതെറാപ്പി യൂനിറ്റ്, ഒ.പി, വാര്‍ഡുകള്‍ എന്നിവിടങ്ങള്‍ സന്ദര്‍ശിച്ചു.