തലശ്ശേരി: വ്യാജ സര്‍ട്ടിഫിക്കറ്റ് വില്‍പ്പന നടത്തി അറസ്റ്റിലായി ജാമ്യത്തിലിറങ്ങിയ തലശ്ശേരി അമൃത കോളജ് ഉടമയും പിണറായി പാറപ്രം സ്വദേശിയുമായ അജയന്‍ വടക്കയിലി(46)നെ തലശ്ശേരി ജുഡീഷ്യല്‍ മജിസ്‌ട്രേറ്റ് കോടതി വീണ്ടും റിമാന്‍ഡ് ചെയ്തത്. കഴിഞ്ഞ വ്യാഴാഴ്ച രാത്രിയാണ് പ്രതിയെ തലശ്ശേരി സി.ഐ പ്രദീപന്‍ കണ്ണിപ്പൊയിലും സംഘവും അറസ്റ്റ് ചെയ്തിരുന്നത്.
പള്ളൂരിലെ നാമത്ത് ഹൗസില്‍ പി.എന്‍ രജില്‍, പ്രണവത്തില്‍ പി. സവിത, കിളിയാമ്പറമ്പില്‍ കെ. രതീഷ് എന്നിവരുടെ പരാതി പ്രകാരമാണ് കേസെടുത്തത്.
കഴിഞ്ഞ വര്‍ഷമാണ് സ്ഥാപനത്തില്‍ പരിശോധന നടത്തി വ്യാജ സര്‍ട്ടിഫിക്കറ്റുകളും വ്യാജ സീലുകളും പിടികൂടിയതിനെ തുടര്‍ന്ന് അജയനെയും കൂട്ടാളി തിരുവന്തപുരം സ്വദേശിനി ടിന്റു ബി. ഷാജിയെയും അറസ്റ്റു ചെയതത്. ഒട്ടേറെ വ്യാജ സര്‍വകലാശാലകളുടെ പേരിലാണ് പണം വാങ്ങി സര്‍ട്ടിഫിക്കറ്റുകള്‍ വിതരണം ചെയ്തിരുന്നത്. കേസന്വേഷണം കഴിഞ്ഞയാഴ്ച ക്രൈംബ്രാഞ്ചിന് വിട്ടിരിക്കുകയാണ്.