കഴക്കൂട്ടം: റവന്യൂ ജില്ലാ സ്‌കൂള്‍ അത്‌ലറ്റിക് മീറ്റില്‍ നെയ്യാറ്റിന്‍കര ഉപജില്ല 181 പോയിന്റുമായി ഓവറോള്‍ കിരീടം നേടി. തിരുവനന്തപുരം നോര്‍ത്ത് 98 പോയിന്റുമായി രണ്ടാം സ്ഥാനത്തും തിരുവനന്തപുരം സൗത്ത് 41 പോയിന്റുമായി മൂന്നാം സ്ഥാനത്തും എത്തി.
നെയ്യാറ്റിന്‍കരയ്ക്ക് 18 സ്വര്‍ണവും 15 വെള്ളിയും 15 വെങ്കലവുമുണ്ട്. നോര്‍ത്തിന് ആറ് സ്വര്‍ണവും പതിനൊന്നുവീതം വെള്ളിയും വെങ്കലവുമാണ് കിട്ടിയത്. സൗത്തിന് മൂന്നു സ്വര്‍ണവും നാലു വെള്ളിയും ഏഴു വെങ്കലവും കിട്ടി. ആണ്‍കുട്ടികളുടെയും പെണ്‍കുട്ടികളുടെയും ചാംപ്യന്‍മാരായത് നെയ്യാറ്റിന്‍കര തന്നെ. യഥാക്രമം 84 ഉം 97 ഉം പോയിന്റുകള്‍. സ്‌കൂളുകളുകളില്‍ ഏറ്റവും മികവ് നെയ്യാറ്റിന്‍കര ഉപജില്ലയിലെ എം.വി.എച്ച്.എസ്.എസ് അരുമാനൂരിനാണ്. ഏഴു സ്വര്‍ണവും ഒന്‍പതു വെള്ളിയും അഞ്ചു വെങ്കലവുമായി അവര്‍ക്ക് 64 പോയിന്റുണ്ട്.
ഈ ഉപജില്ലയിലെതന്നെ പി.കെ.എസ്.എച്ച്.എസ്.എസ് കാഞ്ഞിരംകുളം മൂന്നു സ്വര്‍ണവും അഞ്ചു വെള്ളിയും എട്ടു വെങ്കലവുമായി 38 പോയിന്റു നേടി രണ്ടാമതെത്തി. മൂന്നാമതുള്ള വി. ആന്‍ഡ് എച്ച്.എസ്.എസ് ആര്യനാട് (നെടുമങ്ങാട് ഉപജില്ല) രണ്ടു സ്വര്‍ണവും അഞ്ചു വെള്ളിയും ഏഴു വെങ്കലവുമായി 26 പോയിന്റാണ് നേടിയത്. വ്യക്തിഗത ചാംപ്യന്മാര്‍ സബ് ജൂനിയര്‍ ആണ്‍കുട്ടികള്‍: കരണ്‍ ജിത്ത് (സായ് തിരുവനന്തപുരം). 100 മീറ്റര്‍, 200 മീറ്റര്‍ ഓട്ടമത്സരങ്ങളില്‍ സ്വര്‍ണവും 80 മീറ്റര്‍ ഹര്‍ഡില്‍സില്‍ വെള്ളിയുമായി 13 പോയിന്റുണ്ട്.
സബ് ജൂനിയര്‍ പെണ്‍കുട്ടികള്‍: എം.എ ആതിര (ജി.വി രാജ സ്‌പോര്‍ട്‌സ് സ്‌കൂള്‍). 400 മീറ്റര്‍, 600 മീറ്റര്‍ ഓട്ടമത്സരങ്ങളിലും 80 മീറ്റര്‍ ഹര്‍ഡില്‍സിലും സ്വര്‍ണവുമായി 15 പോയിന്റുണ്ട്. ജൂനിയര്‍ ആണ്‍: പത്തു പോയിന്റ് വീതം കിട്ടിയ ജെ. അഭിജിത്തും കെ. അര്‍ജുനും. തിരുവനന്തപുരം സെന്റ് ജോസഫ്‌സ് എച്ച്.എസ്.എസ് വിദ്യാര്‍ഥിയായ അഭിജിത്തിന് 100 മീറ്റര്‍, 200 മീറ്റര്‍ ഓട്ടമത്സരങ്ങളില്‍ സ്വര്‍ണം കിട്ടി. ജി.വി രാജാ സ്‌പോര്‍ട്‌സ് സ്‌കൂളിലെ അര്‍ജുന് 110ഉം 400ഉം മീറ്റര്‍ ഹര്‍ഡില്‍സിലാണ് സ്വര്‍ണം. ജൂനിയര്‍ പെണ്‍: 15 പോയിന്റ് വീതമുള്ള പ്രിസ്സില ഡാനിയേലും അതുല്യ സജിയും. സായ് തിരുവനന്തപുരത്തിന്റെ പ്രിസ്സില 400 മീറ്റര്‍, 800 മീറ്റര്‍, 1500 മീറ്റര്‍ ഓട്ടമത്സരങ്ങളില്‍ സ്വര്‍ണം നേടി. ജി.വി രാജാ സ്‌പോര്‍ട്‌സ് സ്‌കൂളിലെ അതുല്യക്ക് 100ഉം 400ഉം മീറ്റര്‍ ഹര്‍ഡില്‍സിലും ട്രിപ്പിള്‍ ജമ്പിലും സ്വര്‍ണം കിട്ടി. സീനിയര്‍ ആണ്‍: എ.എസ് എബിന്‍ ജോസഫ് (എല്‍.എം.എസ്. എച്ച്.എസ്.എസ് അമരവിള). ഡിസ്‌കസ് ത്രോയിലും ഹാമര്‍ ത്രോയിലും സ്വര്‍ണവും ഷോട്ട് പുട്ടില്‍ വെങ്കലവുമായി പതിനൊന്നു പോയിന്റ്. സീനിയര്‍ പെണ്‍: പതിനഞ്ചു പോയിന്റ് വീതമുള്ള മിന്നു പി.റോയിയും ഡി. നമിതയും. രണ്ടുപേരും സായ് തിരുവനന്തപുരത്തിന്റെ താരങ്ങള്‍. മിന്നുവിന് 800 മീറ്റര്‍, 1500 മീറ്റര്‍, 3000 മീറ്റര്‍ ഓട്ടമത്സരങ്ങളില്‍ സ്വര്‍ണം കിട്ടി. നമിതയ്ക്ക് 400 മീറ്റര്‍ ഓട്ടത്തിലും 100ഉം 400ഉം മീറ്റര്‍ ഹര്‍ഡിത്സിലുമാണ് സ്വര്‍ണം.