ഹൗറ: ബംഗാളിലെ സാന്ദ്രഗാച്ഛി റെയില്‍വേ സ്റ്റേഷനിലെ മേല്‍പാലത്തിലുണ്ടായ തിക്കിലും തിരക്കിലുംപെട്ട് യാത്രക്കാരായ രണ്ടുപേര്‍ മരിച്ചു. 14 പേര്‍ക്ക് പരുക്കേറ്റു. ഇന്നലെ വൈകുന്നേരം 6.30നായിരുന്നു അപകടം.
റെയില്‍വേ സ്റ്റേഷനിലെ മൂന്ന് പ്ലാറ്റ് ഫോമുകളിലേക്കും എത്താനുള്ള മേല്‍പാലത്തിലേക്ക് കയറാന്‍ ഒരു കോണിപ്പടി മാത്രമാണ് ഉള്ളത്. സ്റ്റേഷനില്‍ രണ്ട് ട്രെയിനുകള്‍ എത്തിയപ്പോള്‍ ഇവയില്‍ കയറാനായി യാത്രക്കാര്‍ക്കിടയിലുണ്ടായ തിരക്കാണ് അപകടത്തിന് കാരണമായത്.
നാഗര്‍കോവില്‍-ഷാലിമാര്‍ എക്‌സ്പ്രസും ഷാലിമാര്‍ -വിശാഖപട്ടണം എക്‌സ്പ്രസും സ്റ്റേഷനില്‍ എത്തിയതും പിന്നാലെ സാന്ദ്രഗാച്ഛി-ചെന്നൈ എക്‌സ്പ്രസ് എത്തുന്നുവെന്ന വിവരവും അറിഞ്ഞതിനെ തുടര്‍ന്നാണ് യാത്രക്കാര്‍ തിരക്കുകൂട്ടിയതെന്ന് സൗത്ത്-ഈസ്റ്റ് റെയില്‍വേ വക്താവ് സഞ്ജയ് ഘോഷ് പറഞ്ഞു.